मुंबई: महाराष्ट्रात सुरू असलेल्या संततधार पावसामुळे राज्याच्या भाजीपाला पुरवठ्यावर मोठा परिणाम झाला आहे. याचा थेट परिणाम म्हणून बाजारात भाजीपाल्याच्या किमती मोठ्या प्रमाणात वाढल्या आहेत. मुंबईतील घाऊक बाजारांमध्ये भाजीपाल्याची आवक लक्षणीय घटली असून, काही बाजारांमध्ये तर दैनंदिन आवक ४० टक्क्यांपर्यंत कमी झाल्याचे वृत्त आहे.
गेल्या काही दिवसांपासून फुलकोबी, शिमला मिरची)आणि पत्ताकोबी यांसारख्या महत्त्वाच्या भाज्यांचे दर वाढले असून वाटाणा ₹१४० प्रति किलो, फुलकोबी- ₹४० प्रति किलो, शिमला मिरची- ₹८० प्रति किलो, पत्ताकोबी, ₹४० प्रति किलो असा दर सध्या सुरु आहे.
या वाढलेल्या किमतींमुळे सामान्य ग्राहकांना मोठा आर्थिक फटका बसत आहे. “भाज्या आवश्यक आहेत, पण वाढलेल्या किमतींमुळे त्या परवडत नाहीत,” अशी प्रतिक्रिया एका गृहिणीने दिली. महागाईचा घरगुती बजेटवर आणखी ताण येण्याची शक्यता आहे.
या जोरदार पावसामुळे उभ्या पिकांचे मोठ्या प्रमाणावर नुकसान झाले आहे, ज्यामुळे बाजारात भाजीपाल्याची टंचाई निर्माण झाली आहे. रस्ते जलमय झाल्याने आणि वाहतूक विस्कळीत झाल्यामुळे शेतकऱ्यांना आपला माल बाजारात पोहोचवण्यात अडचणी येत आहेत. बाजारात भाजीपाल्याची आवक सामान्य झाल्यावर परिस्थिती सुधारेल अशी अपेक्षा आहे. तोपर्यंत ग्राहकांना वाढीव दरांचा सामना करावा लागणार आहे.
