लोणी काळभोर : पुणे-सोलापूर महामार्गावरील कुंजीरवाडी (ता. हवेली) ग्रामपंचायत हद्दीतील ताम्हणे वस्ती ते थेऊर फाटा या दरम्यान ऑइल टँकरमधून गळती झाल्याने रस्त्यावर मोठ्या प्रमाणात तेल सांडले. त्यामुळे या मार्गावरून जाणाऱ्या अनेक दुचाकी घसरून किरकोळ अपघात झाल्याची घटना गुरुवारी (ता. 17) पहाटे सुमारे पाच वाजण्याच्या सुमारास घडली. दरम्यान, वाहतूक पोलिसांनी वेळीच परिस्थितीचे गांभीर्य ओळखून रस्ता सुरक्षित केल्याने मोठा अनर्थ टळला.
थेऊर फाटा चौकात कर्तव्यावर असलेले वाहतूक पोलिस हवालदार उमेश ढाकणे यांनी रस्त्यावर तेल सांडल्याचे निदर्शनास येताच तातडीने सहकाऱ्यांच्या मदतीने घटनास्थळी बॅरिकेड्स लावले. वाहतूक एका बाजूने सुरू ठेवत वाहनचालकांना सावधपणे मार्ग करून दिला. त्यामुळे भरधाव वेगाने येणाऱ्या वाहनांमुळे होणारा संभाव्य मोठा अपघात टाळण्यात यश आले.
या घटनेची माहिती मिळताच, वाघोली येथील पीएमआरडीए अग्निशमन दलाला पाचारण करण्यात आले. अग्निशमन दलाच्या कर्मचाऱ्यांनी घटनास्थळी पोहोचून रस्त्यावर सांडलेले तेल पाण्याने धुऊन काढले. तसेच, आवश्यक ठिकाणी रसायनाचा वापर करून रस्ता वाहतुकीसाठी सुरक्षित केला.
या घटनेमुळे पहाटेच्या वेळी मॉर्निंग वॉकसाठी येणाऱ्या नागरिकांमध्येही काही काळ भीतीचे वातावरण निर्माण झाले होते. प्रत्यक्षदर्शींनी दिलेल्या माहितीनुसार, उमेश ढाकणे व त्यांच्या सहकाऱ्यांनी रस्त्यावर बॅरिकेड्स लावून वाहनचालकांना सावध केले. तेल सांडल्यामुळे काही दुचाकी घसरून पडल्याचेही त्यांनी सांगितले.
प्रतिक्रिया
पुणे-सोलापूर रोडवर अशा प्रकारच्या घटना वारंवार घडत असून, त्यावर प्रशासनाने कायमस्वरूपी उपाययोजना करणे गरजेचे आहे. अपघात किंवा आपत्कालीन परिस्थितीत तातडीने मदत मिळण्यासाठी या मार्गावर अग्निशमन दलाचे वाहन आणि रुग्णवाहिका उपलब्ध असणे आवश्यक आहे. प्रशासनाने नागरिकांच्या सुरक्षेकडे गांभीर्याने पाहून या मार्गावरील आपत्कालीन यंत्रणा अधिक सक्षम करावी. अपघाताच्या वेळी वेळेत मदत न मिळाल्यास मोठी जीवितहानी होऊ शकते.
— सचिन तुपे, माजी सरपंच, कुंजीरवाडी (ता. हवेली)
