लोणी काळभोर, ता. 17 : लोणी काळभोर (ता. हवेली) येथील श्रीक्षेत्र रामदरा येथे दर्शनासाठी गेलेल्या अल्पवयीन मुलीचा गैरफायदा घेत तिच्याशी अश्लील वर्तन करून लगट केल्याची घटना घडली आहे. तसेच, पुन्हा भेटायला न आल्यास तिचे फोटो इंस्टाग्रामवर व्हायरल करण्याची धमकी दिल्याचा प्रकार समोर आला आहे. या घटनेमुळे परिसरात खळबळ उडाली असून लोणी काळभोर पोलीस ठाण्यात एकाच्या विरोधात विनयभंग, पॉस्कोसह विविध गंभीर कलमान्वये गुन्हा दाखल करण्यात आला आहे.
रोहन अथारे (रा. केळवंडी, ता. पाथर्डी, जि. अहिल्यानगर) असे गुन्हा दाखल करण्यात आलेल्या आरोपींचे नाव आहे. याप्रकरणी पिडीत मुलीच्या 34 वर्षीय आईने लोणी काळभोर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, अल्पवयीन मुलगी लोणी काळभोर (ता. हवेली) येथील एका बड्या शाळेत इयत्ता दहावीच्या वर्गात शिकत आहे. अल्पवयीन मुलगी आणि आरोपी रोहन अथारे हे दोघे एकमेकांच्या ओळखीचे आहेत.
दरम्यान, आरोपी रोहन अथारे हा पिडीतेला रामदरा येथे दर्शनासाठी जाऊ असे म्हणून 19 जून 2026 रोजी दुपारी दोन वाजण्याच्या सुमारास घेऊन गेला. आरोपी हा पिडीतेला रामदरा येथे असलेल्या बाळूमामाच्या मंदिराच्या जवळ डोंगराच्या बाजूला घेऊन गेला. बोलण्याच्या बाहाण्याने तिच्या बालवयाचा फायदा घेऊन तिच्या छातीला टच केला.
यावेळी पिडीतेने त्यास विरोध केला असता, आरोपी म्हणाला “आपण मित्र आहोत. मला तु आवडते” असे म्हणून पुन्हा तिच्या हात पकडून तिच्या शरीराला स्पर्श केला. यामुळे पीडिता यांच्या स्त्री मनास लज्जा उत्पन्न झाली. आरोपीने पिडीता यांचा विनयभंग केला व पुन्हा भेटायला आली नाहीस तर तुझे फोटो इन्स्टाग्रामवर व्हायरल करेल अशी धमकी दिली.
याप्रकरणी अल्पवयीन मुलीच्या आईने लोणी काळभोर पोलिस ठाण्यात तक्रार दिली. त्यानुसार आरोपी रोहन अथारे याच्यावर भारतीय न्याय संहीता कलम 74 , 351 (2 ), बालकांचे लैंगिक अपराधांपासुन संरक्षण अधिनियम 2012 कलम 8 , 12 प्रमाणे गुन्हा दाखल करण्यात आला आहे. पुढील तपास लोणी काळभोर पोलिस ठाण्याचे वरिष्ठ पोलिस निरीक्षक प्रदीप पवार यांच्या मार्गदर्शनखाली पोलिस उपनिरीक्षक तैब्बुदीन मुंडे करत आहेत.
