Indapur: इंदापूर तालुक्यातील निमगाव केतकी येथील दोन सराईत गुन्हेगारांना आगामी निवडणुकीच्या पार्श्वभूमीवर इंदापुरसह, बारामती, पुरंदर, दौंड व हवेली तालुक्यातून एक वर्षांसाठी तडीपार करण्यात आले आहे, अशी माहिती पोलिस निरीक्षक विलास नाळे यांनी दिली. (Latest Crime News)
पोलिस अधिक्षक संदिपसिंह गिल यांचे आदेशाने सध्या पोलिस प्रशासनाद्वारे गुन्हे व गुन्हेगारांना पायबंद घालण्याचे काम सुरू आहे. त्या अनुषंगाने इंदापूर पोलिस ठाण्यांतर्गत सराईत आरोपीविरुद्ध प्रतिबंधात्मक कारवाया करून बंधपत्र घेण्यात येत आहे. तरीसुद्धा काही गुन्हेगार त्यांच्या वागणुकीमध्ये बदल करताना दिसून येत नाहीत. त्यामुळे पोलिस ठाणे हद्दीतील सराईत गुन्हेगार गोगा ऊर्फ संतोष काळूराम मिसाळ (वय 42 वर्षे) व लक्ष्मण सुरेश मिसाळ (वय 21 वर्षे) (दोघे रा. निमगाव केतकी) हे आजूबाजूच्या परिसरात दहशत निर्माण करण्याकरिता खुनाचा प्रयत्न, बेकायदेशीरपणे घातक हत्यारांचा वापर करून दरोडा घालणे, संगनमत करून साधी व गंभीर दुखापत करणे, विनयभंग करणे, बेकायदेशीर अग्नीशस्त्र वापरून बेकायदा गर्दी जमवून खुनाचा प्रयत्न करणे व पुरावा नाहीसा करणे अशाप्रकारचे गंभीर गुन्हे करत आहेत. त्यांना वेळीच आवर घालण्याकरिता एक वर्षाकरिता हद्दपार करण्यात आले आहे.
ही कामगिरी पोलिस अधिक्षक गिल, अप्पर पोलिस अधिक्षक गणेश बिरादार, उपविभागीय पोलिस अधिकारी डॉ. सुदर्शन राठोड यांचे मार्गदर्शनाखाली इंदापूर पोलिस ठाण्याचे पोलिस निरिक्षक विलास नाळे, सहाय्यक पोलिस निरीक्षक जिवन मोहिते, पोलिस उपनिरीक्षक अजित बिरादार, पोलिस हवालदार सलमान खान, पोलिस शिपाई लक्ष्मण सूर्यवंशी, तुषार चव्हाण, अंकुश माने, गणेश डेरे, योगेश कर्चे, विनोद लोखंडे, सूरज गुंजाळ, दिनेश चोरमले यांनी केली.
