उरुळी कांचन : एकीकडे संपूर्ण देश स्वातंत्र्य दिनाचा उत्सव साजरा करत असताना, दुसरीकडे दौंड तालुक्यातील बोरीऐंदी परिसरात एका अत्यंत दुर्दैवी आणि काळजाचा ठोका चुकवणाऱ्या घटनेने शोककळा पसरली आहे. विहिरीच्या बाजूला मित्रांसोबत खेळत असताना 12 वर्षांचा मुलग्याचा तुडुंब भरलेल्या विहिरीत पडल्याने बुडून मृत्यू झाला. ही धक्कादायक घटना शनिवारी (ता. 15) सायंकाळी पाच वाजण्याच्या सुमारास उघडकीस आली.
आकाश लखन घोर (वय 12, मूळ रा. भोपालपूर, ता. देवरी, जि. सागर, मध्य प्रदेश; सध्या रा. बोरीऐंदी, ता. दौंड) असे दुर्दैवी मृत्यू झालेल्या मुलाचे नाव आहे.
मिळालेल्या माहितीनुसार, मृत आकाश याचे आई-वडील उदरनिर्वाहासाठी मध्य प्रदेशातून बोरीऐंदी परिसरात आले असून, ते येथील एका स्थानिक कंपनीत मजुरीचे काम करतात. ते राहत असलेल्या परिसरातच काही दिवसांपूर्वी एका नवीन विहिरीचे काम पूर्ण झाले होते. सद्या पडणाऱ्या पावसामुळे ही विहीर पाण्याने तुडुंब भरली होती.
शनिवारी सायंकाळी आकाश हा आपल्या मित्रांसोबत या विहिरीच्या परिसरात खेळत होता. खेळत असताना त्याचा अचानक तोल गेला आणि तो खोल विहिरीत कोसळला. सोबत खेळणाऱ्या मित्रांच्या डोळ्यांसमोरच आकाश पाण्यात बुडू लागल्याने लहान मुलांची मोठी भंबेरी उडाली. त्यांनी तात्काळ पळत जाऊन कंपनीत काम करत असलेल्या आकाशच्या आई-वडिलांना या घटनेची माहिती दिली.
घटनेची माहिती मिळताच बोरीऐंदी परिसरात ही बातमी वाऱ्यासारखी पसरली आणि नागरिकांनी विहिरीकडे धाव घेतली. मात्र, विहिरीत पाण्याचा साठा प्रचंड असल्याने आणि विहीर खोल असल्याने मुलाचा शोध घेण्यात मोठे अडथळे येत होते.
घटनेचे गांभीर्य ओळखून ‘कस्तुरी प्रतिष्ठान’चे अध्यक्ष मिलिंद मेमाणे, घनश्याम मेमाणे, कौस्तुभ मेमाणे, अथर्व मेमाणे, रतन चव्हाण, संतोष झोंबडे, यांनी तात्काळ घटनास्थळी धाव घेतली. त्यांनी विलंब न करता विशेष मशीनच्या साहाय्याने विहिरीच्या पात्रात शोधमोहीम राबवून अवघ्या पाच मिनिटांत आकाशचा मृतदेह शोधून बाहेर काढला.
दरम्यान, विहिरीतून बाहेर काढल्यानंतर आकाशला तातडीने उपचारासाठी यवत येथील प्राथमिक आरोग्य केंद्रात हलवण्यात आले. मात्र, तेथील वैद्यकीय अधिकाऱ्यांनी तपासणी करून उपचारापूर्वीच त्याचा मृत्यू झाल्याचे घोषित केले. ऐन स्वातंत्र्य दिनाच्या दिवशीच परप्रांतीय मजूर कुटुंबातील 12 वर्षांच्या चिमुकल्याचा असा करुण अंत झाल्याने यवत व बोरीऐंदी परिसरातून अत्यंत हळहळ व्यक्त केली जात आहे.
