Gautami Patil : प्रसिद्ध नृत्यांगना गौतमी पाटील हिच्या कार्यक्रमांमध्ये होणारी प्रचंड गर्दी आणि त्यातून निर्माण होणारा गोंधळ पुन्हा एकदा समोर आला आहे. वर्धा शहरात झालेल्या तिच्या कार्यक्रमात प्रेक्षकांनी अक्षरशः धुडगूस घातला.
मागच्या रांगेतील लोकांना स्टेजवरचा डान्स नीट दिसत नव्हता, आणि त्यावरूनच वाद सुरू झाला. पाहता पाहता भांडण बळावलं आणि प्रेक्षक एकमेकांवर खुर्च्या फेकू लागले. सोशल मीडियावर व्हायरल झालेल्या व्हिडिओमध्ये तरुण प्लास्टिकच्या खुर्च्या एकमेकांकडे भिरकावताना स्पष्ट दिसत आहेत. काहीजण तर खुर्च्या जमिनीवर आपटून त्यांची तोडफोड करतानाही दिसले.
या गोंधळामुळे कार्यक्रमाच्या ठिकाणी काही काळ तणावाचं वातावरण तयार झालं. प्रेक्षक अनियंत्रित होताच आयोजकांना गर्दी सांभाळण्यासाठी जोराची धडपड करावी लागली. परिस्थिती हाताबाहेर जाताना पाहून पोलिसांनीही हस्तक्षेप केला.
राडा इतका वाढला की गौतमी पाटीलचा डान्स कार्यक्रम काही वेळासाठी बंद करावा लागला. गोंधळ शांत करण्यासाठी आयोजकांनी बाउन्सरही पाठवले, पण बाउन्सर आणि काही प्रेक्षक यांच्यात उलट बाचाबाची झाली आणि परिस्थिती आणखी बिघडली.
