बदलापूर : बदलापुरात माजी नगरसेवकाला अश्लील फोटो व्हायरल करण्याची धमकी देत ५० लाख रुपयांची खंडणी मागितल्याचा धक्कादायक प्रकार समोर आला आहे. याप्रकरणी बदलापूर पूर्व पोलिसांनी गुन्हा दाखल करत चार आरोपींना बेड्या ठोकल्या आहेत. या सर्व आरोपींना 15 मार्चपर्यंत न्यायालयाने पोलीस कोठडी सुनावली आहे.
याबाबत अधिक माहिती अशी की, माजी नगरसेवक शैलेश वडनेरे यांना अज्ञात नंबरवरून व्हॉट्सअॅपवर आलेल्या व्हिडीओमध्ये अश्लील फोटो होते. हे व्हिडिओ व्हायरल करण्याची धमकी देत समोरच्याने 50 लाख रुपयांची खंडणी मागितली. मात्र माजी नगरसेविकांनी याकडे दुर्लक्ष केलं मात्र त्यानंतर समोरच्या व्यक्तीकडून खंडणीखोराचा तगादा वाढल्यानंतर वडनेरे यांनी बदलापूर पोलीस ठाण्यात याबाबत तक्रार दाखल केली. या तक्रारीची गंभीर दखल घेत चार आरोपींना अटक करण्यात आली आहे. अक्षय उर्फ बकरी गोविंद जाधव, रोहिणी दयानंद आडारकर,दीपक मधुकर वाघमारे आणि पुष्कर हरिदास कदम अशी या आरोपींची नाव आहेत.
या प्रकरणाचा पूर्व पोलीस ठाण्याचे वरिष्ठ पोलीस निरीक्षक किरण बालवडकर आणि राजेश गज्जल यांनी तांत्रिक तपास केला. यानंतर त्यांनी बदलापूरमधूनच चार जणांना बेड्या ठोकल्या. त्यानंतर १२ मार्च रोजी न्यायालयात हजर करण्यात आले. यावेळी न्यायालयाने त्यांना १५ मार्चपर्यंत पोलीस कोठडी सुनावली आहे.
