पुणे : दोन तुकडय़ांत एफआरपी देण्याचा कायदा रद्द करून एकरकमी एफआरपी द्या, साखर कारखान्यांची काटामारी संपुष्टात आणण्यासाठी साखर कारखान्यांचे वजनकाटे ऑनलाइन करा, तसेच थकीत एफआरपी तातडीने द्या, अशा अनेक मागण्यासाठी स्वाभिमानी शेतकरी संघटनेच्या वतीने अध्यक्ष माजी खासदार राजू शेट्टी यांच्या नेतृत्वाखाली पुण्यात सोमवारी (ता. ७) साखर आयुक्तालयावर धडक मोर्चा काढण्यात आला. या मोर्चाची सुरुवात अलका टॉकीज चौकातून करण्यात आली आहे.
मागील अनेक वर्षांपासून आर्थिकदृष्टय़ा अडचणीत आलेले कारखाने मागील हंगामापासून फायद्यात आले आहेत. त्यामुळे दोन तुकडय़ांत एफआरपी देण्याचा निर्णय रद्द करावा, एफआरपी एकरकमी मिळावी. बहुतांश कारखान्यांवर काटामारी होते, त्यामुळे कारखान्यांचे वजन काटे ऑनलाइन करावेत. मागील वर्षांची एफआरपी अनेक कारखान्यांनी दिली आहे, असे राजू शेट्टी म्हणाले.
पण, काही कारखान्यांची एफआरपी बाकी आहे, एफआरपी अधिक दोनशे रुपये तातडीने द्या. कारखाने आणि शेतकरी यांची ऊसतोडणी मजुरांच्या मुकादमांकडून आर्थिक पिळवणूक होते, त्यामुळे कारखान्यांना ऊस तोडणी कामगारांचा पुरवठा ऊसतोडणी महामंडळामार्फतच करावा. तोडणी मशिनने तुटलेल्या उसाला पालापाचोळय़ाची कपात ४.५० टक्याऐवजी १.५० टक्के करण्याची गरज असल्याची माहिती त्यांनी दिली.
दरम्यान, साखर कारखान्यांचे वजन काटे संगणीकृत करून सर्व माहिती ऑनलाइन करावी, ही स्वाभिमानी शेतकरी संघटनेची मागणी प्रशासनाने मान्य केल्याची माहिती साखर आयुक्त शेखर गायकवाड यांनी दिली.
