नांदेड: नांदेडमध्ये आंतरजातीय प्रेमसंबंधातून झालेल्या सक्षम ताटे यांच्या हत्येनंतर त्यांच्या कुटुंबाला तसेच त्यांची प्रेयसी आंचल मामीडवार हिला पोलिस संरक्षण देण्यात आले आहे. संघसेन नगर भागातील सक्षमच्या घरासमोर दोन शस्त्रधारी पोलिस कर्मचाऱ्यांची 24 तास सुरक्षा तैनात करण्यात आली आहे. (Saksham Tate Murder Case)
सक्षम ताटे आणि आंचल मामीडवार यांचे प्रेम संबंध होते. विवाह करण्याचा त्यांनी निर्णय घेतला होता. मात्र त्यांच्या नात्याची माहिती मिळताच आंचलच्या वडिलांनी आणि भावांनी सक्षमला आंचलपासून दूर राहण्याचा दबाव टाकण्याचा प्रयत्न केला. तरीही दोघेही विवाहाच्या निर्णयावर ठाम राहिल्याने मामीडवार कुटुंबाने संतापाच्या भरात सक्षमची निर्घृण हत्या केल्याचा आरोप आहे. 27 नोव्हेंबर रोजी ही घटना घडली.
हेही वाचा: शनी शिंगणापूर देवस्थान घोटाळ्यात मध्यरात्री 2 कर्मचाऱ्यांची अटक; भक्तांची देणगी नेमकी गेली कुठे?
दोन्ही कुटुंबांना संरक्षण
या प्रकरणी आंचलचे वडील, दोन्ही भाऊ आणि अन्य तीन जणांना अटक करण्यात आली असून, दोघे आरोपी अद्याप फरार आहेत. तिन्ही अटक आरोपी पोलीस कोठडीत असून तपास सुरू आहे. घटनेनंतर सक्षमच्या कुटुंबाला धोका असल्याची शक्यता व्यक्त होत होती. आंचलसोबत अनेक सामाजिक संघटनांनीही सक्षमच्या कुटुंबाला सुरक्षा देण्याची मागणी केल्यानंतर पोलिसांनी दोन्ही कुटुंबांना संरक्षण पुरवले आहे.
जातीय द्वेषातून सक्षमची निर्घृण हत्या
नांदेडच्या इतवारा परिसरात घडलेल्या या हत्येने जातीय द्वेषाचा मुद्दा पुन्हा एकदा समोर आला आहे. सक्षम ताटे याच्या जातीमुळे आंचलच्या कुटुंबीयांनी प्रेमसंबंध आणि विवाह यास विरोध दर्शविला. त्याच जातीय द्वेषातून सक्षमची निर्घृण हत्या केल्याचा आरोप करण्यात येत आहे. प्रियकराच्या मृत्यूनंतर आंचलने सक्षमच्या पार्थिवासमोर प्रतीकात्मक विवाह केला.
“तो आज नाही, पण मृत्यूनंतरही जिंकला आहे,” असे ती म्हणाली. तसेच, “केवळ जात वेगळी असल्यामुळे आमच्या विवाहास परवानगी मिळाली नाही आणि जातीमुळेच त्याचा जीव घेतला गेला,” असा आंचलने आरोप केला आहे. आरोपी स्वतः तिच्या कुटुंबातीलच असल्याने त्यांना कठोर शिक्षा देण्याची मागणी तिने केली आहे.
