पुणे : पुणे शहरातील बंडगार्डन वाहतूक विभागांतर्गत येणाऱ्या कौन्सिल हॉल चौक ते साधू वासवानी चौक दरम्यानच्या रस्त्यावरील वाहतुकीत महत्त्वपूर्ण बदल करण्यात आले आहेत. येत्या 22 ऑगस्टपासून कौन्सिल हॉल चौकातून साधू वासवानी चौकाकडे जाणारी वाहतूक पूर्णपणे बंद राहील. वाहतूक कोंडी टाळण्यासाठी आणि प्रवाशांच्या सुरक्षेसाठी हा रस्ता केवळ साधू वासवानी चौकाकडून येणाऱ्या वाहनांसाठी एकेरी करण्यात आला आहे, अशी माहिती पोलीस उपायुक्त जीवन बेनिवाल यांनी दिली.
वाहतुकीसाठी पर्यायी मार्ग
साधू वासवानी चौकाकडे जाणाऱ्या वाहनांसाठी: कौन्सिल हॉल चौकातून सरळ न जाता, वाहनधारकांनी डावीकडे वळण घेऊन ब्लू नाईल चौकाचा वापर करावा. तेथून पुढे उजवीकडे वळून आयबी चौक मार्गे आपल्या इच्छित स्थळाकडे जावे.
किराट चौक ते मॅरेज ब्युरो मार्ग: किराट चौक ते मॅरेज ब्युरोदरम्यानच्या चर्च रस्त्यावरही एकेरी वाहतूक लागू करण्यात आली आहे. एस. बी. आय. (SBI) बँकेच्या बाजूने किराट चौकाकडे जाणाऱ्या वाहनधारकांनी मॅरेज ब्युरो येथून डावीकडे वळून पुढे जावे.
वाहतुकीतील या नव्या बदलांबाबत नागरिकांना काही सूचना मांडायच्या असल्यास किंवा हरकती नोंदवायच्या असल्यास, त्या 5 सप्टेंबरपर्यंत लेखी स्वरूपात सादर करता येतील. यासाठी अर्ज वाहतूक शाखा, येरवडा पोस्ट ऑफिस, बंगला नंबर 6, एअरपोर्ट रोड, पुणे या पत्यावर जमा करावेत, असे आवाहन वाहतूक पोलिसांकडून करण्यात आले आहे.
या परिसरातील प्रवास सुरळीत व्हावा यासाठी नागरिकांनी तसेच वाहनधारकांनी वाहतूक नियमांचे पालन करून पोलिसांना सहकार्य करावे.
