नांदेड : नांदेड जिल्ह्यातील लोहा तालुक्यातील सोनखेड पोलीस ठाण्याच्या हद्दीत एक अतिशय संतापजनक आणि मन हेलावून टाकणारी घटना समोर आली आहे. एका तीन वर्षीय चिमुकलीला चॉकलेटचे आमिष दाखवून तिच्यावर नातेवाईक असलेल्या नराधमानेच अत्याचार केल्याचा संतापजनक प्रकार उघडकीस आला आहे. या घटनेमुळे परिसरात तीव्र रोष व्यक्त केला जात असून, पीडित बालिकेच्या आईच्या फिर्यादीवरून सोनखेड पोलिसांनी मंगळवारी (२५ ऑगस्ट) पहाटे गुन्हा दाखल केला आहे.
सोमवारी (२४ ऑगस्ट) सायंकाळी पीडित चिमुकली आपल्या घरासमोरील अंगणात खेळत होती. त्याच वेळी शेजारी राहणाऱ्या आणि नात्याने ‘बाबा’ हाक मारल्या जाणाऱ्या संबंधित नराधमाने तिला चॉकलेटचे आमिष दाखवून स्वतःसोबत नेले. साधारण २० ते २५ मिनिटांनंतर आरोपीने त्या मुलीला पुन्हा तिच्या घरी सोडले आणि तो निघून गेला. मुलगी सतत रडत असल्याचे पाहून आईला शंका आली, तिने मुलीकडे विचारपूस केली असता, आरोपीने तिच्यासोबत अमानुष कृत्य केल्याचे चिमुकलीने सांगितले.
मुलीला शारीरिक दुखापत झाल्याचे लक्षात आल्यानंतर पालकांनी तिच्यावर तातडीने नांदेड येथील शासकीय रुग्णालयात (विष्णूपुरी) उपचारांसाठी दाखल केले. सध्या बालिकेवर डॉक्टरांच्या देखरेखीखाली उपचार सुरू असून तिची प्रकृती स्थिर असल्याची माहिती कुटुंबीयांनी दिली आहे.
या घटनेची माहिती मिळताच सोनखेड पोलीस ठाण्याचे सहायक पोलीस निरीक्षक भागवत नागरगोजे यांनी आपल्या पथकासह तातडीने घटनास्थळी धाव घेऊन पंचनामा केला. पीडितेच्या आईने दिलेल्या तक्रारीवरून पहाटे तीनच्या सुमारास संशयित आरोपीविरुद्ध पोक्सो (POCSO) आणि इतर गंभीर कलमांन्वये गुन्हा दाखल करण्यात आला आहे. घटनेनंतर आरोपी फरार झाला असून, पोलिसांची विविध पथके त्याचा कसून शोध घेत आहेत. लहान मुलांवरील अशा प्रकारच्या वाढत्या घृणास्पद कृत्यांमुळे समाजमनात संतापाची लाट उसळली आहे.
