मुंबई : ठाकरे गटाच्या नगरसेविका आणि मुंबईच्या माजी महापौर विशाखा राऊत यांचे जात प्रमाणपत्र पालघर जिल्हा जात प्रमाणपत्र पडताळणी समितीने अवैध ठरवले आहे. या निर्णयानंतर शिंदे गटाचे नेते सदा सरवणकर आणि त्यांच्या कन्या प्रिया सरवणकर यांनी मुंबई महापालिका आयुक्त अश्विनी भिडे यांची भेट घेतली. यामुळे राजकीय वर्तुळात चर्चाना उधाण आले आहे.
शिंदे गटाचे नेते सदा सरवणकर आणि त्यांच्या कन्या प्रिया यांनी पालिका प्रशासनाने कायद्यानुसार त्वरित पुढील कार्यवाही करावी, अशी मागणी केली आहे . विशाखा राऊत यांनी या निर्णयावर तीव्र आक्षेप घेतला आहे. जात पडताळणीसाठी आवश्यक ती सर्व कायदेशीर कागदपत्रे सादर केली होती; मात्र राजकीय दबाव आणून हे प्रमाणपत्र रद्द करण्यात आल्याचा आरोप त्यांनी शिंदे गटावर केला.
दुसरीकडे, शिंदेसेनेचे नगरसेवक अमेय घोले यांनी सांगितले की, सर्व कागदपत्रे प्रशासनाकडे दिली असून पुढील निर्णय कायद्यातील आणि राजपत्रातील तरतुदींनुसार गुणवत्तेच्या आधारावरच होईल. या प्रकरणी कायदेशीर बाजू मांडण्यासाठीच आयुक्तांची भेट घेतल्याचे सदा सरवणकर यांनी स्पष्ट केले. तत्पूर्वी, 21 ऑगस्ट रोजी सरवणकर पिता-कन्यांनी उपमुख्यमंत्री एकनाथ शिंदे यांचीही भेट घेतली होती.
यापूर्वी प्रिया सरवणकर यांनी विशाखा राऊत यांच्याविरोधात महापालिका निवडणूक लढवली होती. या निवडणुकीत त्यांचा पराभव झाला होता. त्यानंतर राऊत यांनी खोटे जात प्रमाणपत्र सादर केल्याची तक्रार प्रिया सरवणकर यांनी केली होती. पुढील 3 महिन्यांत वैध जात पडताळणी प्रमाणपत्र सादर न केल्यास नगरसेवकपद रद्द होऊ शकते.
दरम्यान नियम आणि कायद्यानुसार, विजयी उमेदवाराचे पद रद्द झाल्यास निवडणुकीत दुसऱ्या क्रमांकावर असलेल्या उमेदवाराला विजयी घोषित केले जाऊ शकते.
