पुणे : नागरिकांना विविध शासकीय योजनांचा लाभ मिळावा आणि त्यांच्या तक्रारींचे त्वरित निवारण व्हावे, या उद्देशाने श्रीक्षेत्र थेऊर (ता. हवेली) येथे छत्रपती शिवाजी महाराज महाराजस्व अभियानांतर्गत विशेष ‘समाधान शिबिराचे’ आयोजन करण्यात आले आहे. हे शिबिर शुक्रवारी, 31 जुलै 2026 रोजी सकाळी 10 वाजता थेऊर येथील आशीर्वाद बँक्वेट हॉलमध्ये पार पडणार आहे, अशी माहिती हवेली पंचायत समितीचे सभापती युवराज काकडे यांनी दिली.
महाराष्ट्र शासनाच्या महसूल व वन विभागाच्या 13 जुलै 2026 च्या शासन निर्णयानुसार हे शिबिर आयोजित केले जात आहे. अप्पर तहसील कार्यालय हवेली आणि पंचायत समिती हवेली यांच्या संयुक्त विद्यमाने महसूल दिनाचे औचित्य साधून या कार्यक्रमाची आखणी करण्यात आली आहे.
या कार्यक्रमाला पुणे जिल्ह्याचे जिल्हाधिकारी जितेंद्र डुडी आणि स्थानिक आमदार ज्ञानेश्वर उर्फ माऊलीआबा कटके हे प्रमुख पाहुणे म्हणून उपस्थित राहणार आहेत. यासोबतच हवेली तालुक्यातील विविध शासकीय विभागांचे अधिकारी, स्थानिक लोकप्रतिनिधी, जिल्हा परिषद व पंचायत समितीचे सदस्य मोठ्या संख्येने उपस्थित राहतील.
हवेलीच्या अप्पर तहसीलदार तृप्ती कोलते पाटील यांनी दिलेल्या माहितीनुसार, या शिबिरामध्ये नागरिकांना एकाच छताखाली खालील सेवा मिळतील:
महसूल व भूमी अभिलेख: 7/12 उतारा दुरुस्ती, प्रलंबित फेरफार, ई-मोजणी प्रकरणे, वर्ग 2 ची जमीन वर्ग 1 करणे, भूसंपादन व अकृषिक कमी-जास्त पत्रक दुरुस्ती.
दाखले व योजना: उत्पन्न दाखला, जात प्रमाणपत्र, रहिवासी दाखला, घरकुल योजना, संजय गांधी निराधार योजना व अपंगांसाठीच्या विविध योजना.
शेतकरी व ग्रामीण समस्या: मुख्यमंत्री शेत-पानंद रस्ते योजना, अॅग्रीस्टॅक ID काढणे, SIR अर्ज भरणे, कृषी विभागाच्या योजना, ग्रामपंचायतीची घरपट्टी व पाणीपट्टी, महावितरण (MSEB) संदर्भातील तक्रारी आणि आरोग्य सेवा.
यापूर्वी ज्या नागरिकांनी विविध दाखल्यांसाठी अर्ज केले होते, त्यांना या शिबिरात जात व उत्पन्नाच्या दाखल्यांचे प्रत्यक्ष वाटप केले जाणार आहे. परिसरातील सर्व नागरिकांनी या सुविधेचा जास्तीत जास्त लाभ घ्यावा, असे आवाहन प्रशासनाकडून करण्यात आले आहे.
