पुणे: कात्रज बायपास मार्गावरील (Pune News) वाहतुकीत सातत्याने वाढत असलेल्या वेगामुळे आणि त्यातून होणाऱ्या अपघातांच्या घटनांवर नियंत्रण ठेवण्यासाठी पुणे वाहतूक विभागाने मोठा निर्णय घेतला आहे. कात्रज नवीन बोगदा ते नवले ब्रिजदरम्यान सर्व वाहनांसाठी कमाल वेगमर्यादा आता 40 किमी प्रतितास अनिवार्य करण्यात आली आहे. अत्यावश्यक सेवांतील वाहने जसे की अग्निशमन, पोलीस आणि रुग्णवाहिका यांना मात्र या मर्यादेतून सवलत देण्यात आली आहे.
मोटार वाहन कायद्याच्या कलम 115, 116(1)(2)(B), 116(4) आणि 117 अंतर्गत मिळालेल्या अधिकारांचा वापर करून पोलिस उप-आयुक्त (वाहतूक) हिंमत जाधव यांनी हा आदेश जारी केला. भुमकर ब्रिज ते नवले ब्रिज या संपूर्ण मार्गावर ही नवीन वेगमर्यादा लागू होणार असून 4 डिसेंबर 2025 पासून ती अंमलात येणार आहे. यापूर्वी या मार्गावर लागू असलेले सर्व वेगमर्यादा आदेश रद्द करण्यात आले आहेत.
वाहनचालकांनी आपापल्या वाहनांचे स्पीडोमीटर व्यवस्थित कार्यरत आहेत का ते तपासणे, तसेच रस्त्यावर लावलेल्या सूचनाफलक आणि वेगमर्यादा दर्शवणाऱ्या बोर्डांचे पालन करणे आवश्यक आहे, असे वाहतूक विभागाने स्पष्ट केले आहे. वेगमर्यादा भंग करणाऱ्या वाहनांवर आता CCTV आणि स्पीड गनद्वारे थेट पुरावे गोळा करून कठोर कारवाई करण्यात येणार आहे.
वाहतूक विभागाने नागरिकांना आवाहन केले आहे की, वाहतूक सुरक्षित व सुरळीत ठेवण्यासाठी या नियमांचे काटेकोर पालन करावे आणि विभागाला सहकार्य करावे. कात्रज बायपासवरील अपघातांची संख्या कमी करण्यासाठी वेगमर्यादा अंमलबजावणी हा महत्त्वाचा टप्पा मानला जात आहे.
