Pune Crmie News : पुण्यातील विशेष न्यायालयाने 10 वर्षांच्या अल्पवयीन मुलीवर वारंवार लैंगिक अत्याचार केल्याप्रकरणी आरोपी काकाला 25 वर्षे सक्तमजुरी आणि 100000 दंडाची शिक्षा सुनावली. विशेष न्यायाधीश एच. एम. भोसले यांनी हा निकाल दिला.
या प्रकरणात 11 मे 2021 रोजी हिंजवडी पोलीस ठाण्यात गुन्हा दाखल करण्यात आला होता. 2018 ते मे 2021 या कालावधीत आरोपीने आपल्या घरी पीडितेवर अत्याचार केल्याचे तपासात समोर आले. पीडित मुलीच्या आईचा खून झाल्याने वडील तुरुंगात असून ती मावशीकडे राहत होती.
पतीच्या वागणुकीवर संशय आल्यामुळे 10 मे 2021 रोजी आरोपीच्या पत्नीने घरात मोबाइल ठेवून व्हिडिओ चित्रीकरण केले. त्यामध्ये आरोपी काका पीडितेवर अत्याचार करत असल्याचे दिसून आले. या चित्रीकरणाच्या आधारे पोलिसांत तक्रार दाखल करण्यात आली. तपासादरम्यान आरोपीला अटक करून आरोपपत्र दाखल करण्यात आले.
खटल्यादरम्यान आरोपीच्या पत्नीने साक्ष फिरवली. मात्र पीडितेची साक्ष, मोबाइलमधील चित्रीकरण, डीएनए अहवाल, वैद्यकीय तपासणी आणि परिस्थितीजन्य पुरावे यांच्या आधारे न्यायालयाने गुन्हा सिद्ध मानला. विशेष सरकारी वकील अरुंधती ब्रह्मे यांनी या प्रकरणात 9 साक्षीदार तपासले.
न्यायालयाने निकालात आरोपीने पीडितेच्या असहाय परिस्थितीचा गैरफायदा घेतल्याचे नमूद केले. तसेच, पीडितेला नियमानुसार भरपाई देण्याचे निर्देशही दिले.
