पुणे, : बाणेर सारख्या उच्चभ्रू परिसरात एका 52 वर्षीय महिलेच्या आईला जिवंत असतानाच कागदोपत्री मृत दाखवून, त्यांच्या मालकीची कोट्यवधींची जमीन हडपण्याचा प्रयत्न करण्यात आला. याप्रकरणी बाणेर पोलिसांनी तिघांविरुद्ध फसवणुकीचा गुन्हा दाखल केला आहे. पैशांच्या लालसेपोटी नात्यांची आणि माणुसकीची सर्व सीमा ओलांडणारा एक धक्कादायक प्रकार पुण्यात उघडकीस आल्याने परिसरात एकच खळबळ उडाली.
हा प्रकार 28 फेब्रुवारी 2024 ते 17 एप्रिल 2026 या दोन वर्षांच्या कालावधीत घडला आहे. याप्रकरणी मृणालिनी संजय निकम (वय-52, रा. पाषाण) यांनी तक्रार दिली आहे. त्यानुसार पोलिसांनी सविता दत्तात्रय सोमवंशी, शैलेश राठोड व दत्तात्रय संभाजीराव शिंदे या तिघांवर गुन्हा दाखल केला आहे.
पोलिसांनी दिलेल्या माहितीनुसार, फिर्यादी त्यांच्या वडिलांनी 1988 मध्ये बाणेर येथे 430 चौरस मीटरचा प्लॉट त्यांच्या आईच्या नावावर घेतला होता. एप्रिल 2026 मध्ये जेव्हा या जागेच्या विकासासाठी हालचाली सुरू झाल्या आणि मृणालिनी यांनी ऑनलाइन सातबारा व इतर नोंदी तपासल्या, तेव्हा त्यांना तिथे धक्कादायक बदल दिसले. जमिनीच्या मालकी हक्कात एका अनोळखी महिलेचे नाव पाहून त्यांना संशय आला आणि त्यांनी कार्यालयात धाव घेतली.
यावेळीआरोपींनी ई-हक्क प्रणालीमध्ये फेरफार करण्यासाठी मृणालिनी यांच्या आईचा बनावट मृत्यू दाखला तयार केला, तर प्रत्यक्षात त्या जिवंत आहेत. आई मृत झाल्याचे भासवून खोटे वारस प्रमाणपत्र तयार करण्यात आले आणि जमिनीच्या नोंदी स्वतःच्या नावावर करण्यासाठी तहसील कार्यालयात अर्ज करण्यात आला. या जमिनीचे अधिकार मिळवण्यासाठी बनावट ‘पॉवर ऑफ अटर्नी’ (कुलमुखत्यारपत्र) देखील तयार करण्यात आले होते.
दरम्यान, बाणेर पोलिसांनी या तक्रारीवरून सविता सोमवंशी, शैलेश राठोड व दत्तात्रय शिंदे यांच्याविरुद्ध गुन्हा दाखल केला आहे. हा प्रकार 28 फेब्रुवारी 2024 ते 17 एप्रिल 2026 या दोन वर्षांच्या कालावधीत घडला आहे. या प्रकरणी सहाय्यक पोलीस निरीक्षक बाबासाहेब झरे पुढील तपास करत आहेत.
