लोणी काळभोर, ता. २१ : लोणी काळभोर येथील आठवडे बाजारात ‘नो पार्किंग’च्या बोर्डखालीच दुचाकी लावण्यात येतात ही एक गंभीर वाहतूक समस्या आणि बेजबाबदारपणाचे लक्षण असून गर्दीच्या ठिकाणी अशी बेशिस्त वर्तणूक केल्याने संपूर्ण बाजारपेठेत वाहतूक कोंडी निर्माण होते आणि पादचाऱ्यांना चालणे कठीण होते आहे. पोलीस प्रशासन मात्र यांकडे दुर्लक्ष करत असल्याचे चित्र दिसत आहे.
दर शनिवारी लोणी काळभोर येथील आठवडे बाजार भरतो. दिवसेंदिवस वाढत असलेल्या लोकसंख्येमुळे व नजीकच्या गांवचे नागरिक येथे खरेदीसाठी येत असल्याने शनिवारी प्रचंड प्रमाणात गर्दी असते. बहुतांश नागरिक दुचाकीवरून येतात. ते आपली दुचाकी रस्ता दुभाजकानजीक अथवा प्राथमिक आरोग्य केंद्रात लावून बाजारात जातात. यावेळी कर्मचाऱ्यांनी लावू नका असे सांगितले तर त्यांना दमदाटी केली जाते. ये-जा करण्यासाठी वेगवेगळे रस्ते असले तरी लावलेल्या दुचाकींमुळे अधीच अरुंद असलेला रस्ता आणखी अरुंद होत असल्याने याचा त्रास नागरिकांना होतो.
ग्रामपंचायतीच्या वतीने वाहन पार्किंगची व्यवस्था करण्यात आली आहे.
बाजारात असलेल्या रस्त्यावर ठिकठिकाणी वाहणे लावू नयेत असे फलक लावण्यात आले आहेत. विशेष म्हणजे यांकडे दुर्लक्ष करून फलकांखालीच दुचाकी लावल्या जातात. महामार्ग अथवा गावांतून चारचाकी वाहन आले तर मोठ्या प्रमाणात वहातूक कोंडी होते. त्यावेळी पायी चालत जाणा-यांना या अडचणीतून मार्ग काढावा लागतो. विशेष म्हणजे आठवडे बाजारापासून पोलीस ठाणे हाकेच्या अंतरावर आहे. परंतु पोलीस मात्र बाजारात कोठेही दिसत नाहीत. अशी खंत नागरिक व्यक्त करत आहेत.
यासंदर्भात ग्रामपंचायतीच्या वतीने आम्ही आवश्यक ती सर्व काळजी घेत आहोत. मागील आठवड्यात पोलीस प्रशासनासमवेत झालेल्या बैठकीत यासंदर्भात माहिती दिली आहे. वरिष्ठ पोलीस निरीक्षकांनी पोलीस तैनात केला जाईल असे सांगितले आहे.
– नागेश काळभोर (प्रशासक ग्रामपंचायत लोणी काळभोर)
