पुणे : जिल्ह्यातील भोर तालुक्यातील वेळू गावात राजगड पोलिसांनी एका रिसॉर्टवर मोठी कारवाई केली आहे. या रिसॉर्टमध्ये सुरू असलेल्या कथित अवैध वेश्याव्यवसायाचा पर्दाफाश करून पोलिसांनी 13 महिलांची सुटका केली आहे. या घटनेमुळे परिसरात मोठी खळबळ उडाली आहे.
पोलिसांना मिळालेल्या गुप्त माहितीनुसार, वेळू येथील आमराई रिसॉर्टमध्ये मागील दोन महिन्यांपासून हा अवैध प्रकार सुरू होता. आर्थिक प्रलोभन दाखवून महिलांकडून हा व्यवसाय करून घेतला जात असल्याची कुणकुण पोलिसांना लागली होती. याची खात्री करण्यासाठी पोलिसांनी एका बनावट ग्राहकाला रिसॉर्टमध्ये पाठवले होते. खात्री पटल्यानंतर 22 ऑक्टोबर रोजी सायंकाळी साडेसहाच्या सुमारास पोलिसांनी तिथे अचानक छापा टाकला.
या कारवाईत पोलिसांनी मुंबई, ठाणे, दिल्ली, पश्चिम बंगाल आणि कर्नाटक या वेगवेगळ्या राज्यांमधून आलेल्या 13 महिलांची सुटका केली. प्राथमिक तपासात या महिलांकडून प्रति ग्राहक 1 हजार रुपयांच्या मोबदल्यात हा व्यवसाय करून घेतला जात असल्याचे उघडकीस आले. या प्रकरणी वैभव बालाजी इंगळे आणि रघु शेट्टी या दोघांवर राजगड पोलीस ठाण्यात गुन्हा दाखल करण्यात आला असून, एका संशयिताला पोलिसांनी अटक केली आहे. तर मुख्य सूत्रधार अजूनही फरार असून पोलीस त्याचा कसून शोध घेत आहेत.
दरम्यान, या रिसॉर्टचे मालक आणि व्यवस्थापन नेमके कोणाकडे होते, याचाही पोलीस कसून तपास करत आहेत. या संपूर्ण रॅकेटमध्ये आणखी कोणाकोणाचा सहभाग आहे हे समोर आणण्यासाठी पोलीस यंत्रणा काम करत असून, या रिसॉर्टचा संबंध एका राजकीय पक्षाच्या पदाधिकाऱ्याशी असल्याचची जोरदार चर्चा सध्या गावात सुरू आहे.
