पिंपरी-चिंचवड : अमली पदार्थांची विक्री करण्यासाठी आलेल्या आरोपीचा पाठलाग करताना पोलिस कर्मचाऱ्याचा हृदयविकाराच्या झटक्याने मृत्यू झाल्याची घटना पिंपरी-चिंचवडमध्ये घडली. रविवारी (ता. 25) रात्री उशिरा संत तुकारामनगर परिसरात अमली पदार्थविरोधी पथकाच्या कारवाईदरम्यान ही घटना घडली.
जावेद बागसिराज (वय -40) असे मृत पोलिस कर्मचाऱ्याचे नाव आहे. ते पिंपरी-चिंचवड पोलिसांच्या गुन्हे शाखेतील अमली पदार्थविरोधी पथकात कार्यरत होते.
मिळालेल्या माहितीनुसार, पोलिसांना संत तुकारामनगर परिसरात दोन जण एमडी (मेफेड्रोन) या अमली पदार्थाची विक्री करण्यासाठी येणार असल्याची माहिती मिळाली होती. त्यानुसार जावेद यांनी वरिष्ठ अधिकाऱ्यांना माहिती देऊन सहकाऱ्यांच्या मदतीने सापळा रचला. या कारवाईत पोलिसांनी एका संशयिताला ताब्यात घेतले. मात्र, त्याचा दुसरा साथीदार पळून जाऊ लागल्याने जावेद यांनी त्याचा पाठलाग सुरू केला.
पाठलाग करत असतानाच जावेद यांच्या छातीत अचानक तीव्र वेदना सुरू झाल्या आणि ते जमिनीवर कोसळले. सहकारी पोलिसांनी त्यांना तातडीने पिंपरीतील यशवंतराव चव्हाण स्मृती रुग्णालयात दाखल केले. मात्र, उपचार सुरू असताना त्यांना पुन्हा हृदयविकाराचा झटका आला आणि त्यातच त्यांचा मृत्यू झाला.
जावेद बागसिराज हे 2010 मध्ये पुणे शहर पोलिस दलात भरती झाले होते. सुरुवातीची आठ वर्षे त्यांनी हडपसर आणि मुंढवा पोलिस ठाण्यांत सेवा बजावली. 2018 मध्ये पिंपरी-चिंचवडसाठी स्वतंत्र पोलिस आयुक्तालय स्थापन झाल्यानंतर ते या पोलिस दलात रुजू झाले. त्यानंतर त्यांनी पिंपरी पोलिस ठाणे आणि गुन्हे शाखेत काम केले. सध्या ते अमली पदार्थविरोधी पथकात कर्तव्य बजावत होते.
दरम्यान, जावेद यांच्या पश्चात आई-वडील, भाऊ, पत्नी, 12 वर्षांची मुलगी आणि सात वर्षांचा मुलगा असा परिवार आहे. कर्तव्य बजावत असताना त्यांचा अचानक मृत्यू झाल्याने कुटुंबावर दुःखाचा डोंगर कोसळला आहे. या घटनेमुळे पिंपरी-चिंचवड पोलिस दलात शोककळा पसरली आहे.
