अमरावती: शहरातील राजापेठ परिसरातील काही कॅफेमध्ये अश्लील वर्तन सुरू असल्याचे धक्कादायक प्रकार उघड झाले आहेत. दामिनी पथक आणि राजापेठ पोलिसांनी संयुक्तपणे केलेल्या कारवाईत, कॅफेमध्ये १३ तरुण-तरुणींना आक्षेपार्ह अवस्थेत पकडण्यात आले. या कारवाईनंतर शहरात मोठी खळबळ उडाली असून, कॅफे चालकांमध्ये घबराट पसरली आहे.

केबिनमध्ये तासनतास थांबणं, लाईट बंद करून बसणं
दामिनी पथकाने मिळालेल्या माहितीच्या आधारे राजापेठ पोलीस ठाण्याच्या हद्दीतील ‘बर्गर लॅन्ड’, ‘फ्युजन बाइट’ कॅफे आणि छत्री तलाव परिसरातील निर्जनस्थळी छापेमारी केली. यावेळी या ठिकाणी १३ युवक-युवती नको त्या अवस्थेत आढळून आले. पोलिसांनी सर्वांना ताब्यात घेऊन पोलीस ठाण्यात आणलं व कसून चौकशी केली. युवतींच्या पालकांना बोलावून त्यांच्याकडे सुपूर्त करण्यात आले. तरुणांची ओळख पटवून नोंद घेण्यात आली. यामुळे कॅफे चालकांमध्ये तणावाचं वातावरण पसरलं आहे.
तासाला २०० रुपयांचं शुल्क; केबिनमध्ये अश्लीलता?
पोलिस तपासात असंही समोर आलं की, या कॅफेमध्ये प्रत्येक जोडप्याला बसण्यासाठी तासाला २०० रुपये शुल्क आकारलं जात होतं. कॅफे चालकांकडून तासानुसार केबिन उपलब्ध करून दिल्या जात होत्या. या केबिनमध्ये लाईट बंद करून, कोणतीही निगराणी नसताना युवक-युवती तासनतास थांबत होते, अशी माहिती पोलिसांकडून देण्यात आली आहे.

कॅफे संस्कृती की अश्लीलतेचा अड्डा?
शहरात सध्या ‘कॅफे कल्चर’ झपाट्याने वाढत असतानाच, काही ठिकाणी या कॅफेचा वापर आंबटशौकीनांसाठी सुरक्षित अड्डा म्हणून होत असल्याचे चित्र उभे राहत आहे. कामासाठी, मित्रमैत्रिणींसोबत वेळ घालवण्यासाठी या ठिकाणी तरुणाई येते. मात्र, काही कॅफे चालक या संधीचा गैरफायदा घेत, अश्लील वर्तनाला खतपाणी घालणारे व्यवहार करत असल्याचे या प्रकरणातून स्पष्ट झाले आहे.

पोलिसांची कडक कारवाईची तयारी
या घटनेनंतर राजापेठ पोलिसांनी आणि दामिनी पथकाने शहरातील इतर कॅफेंवरही बारीक नजर ठेवण्यास सुरुवात केली आहे. अशा प्रकारचा गैरव्यवहार आढळून आल्यास, कॅफे सील करण्याची कारवाई करण्यात येईल, असा इशारा पोलिसांनी दिला आहे.







