पुणे: भारतीय जनता पक्षाने राज्यसभेच्या उमेदवारांची नवीन यादी जाहीर केली आहे. मात्र, या यादीत नाव न आल्यामुळे पक्षांतर्गत नाराजी स्पष्टपणे दिसून येत असून, उत्तर प्रदेशातील बरेली येथील भाजपचे माजी खासदार धर्मेंद्र कश्यप यांच्या एका सोशल मीडिया पोस्टमुळे राजकीय वर्तुळात मोठी चर्चा सुरू झाली आहे.
राज्यसभेचे तिकीट हुकल्यानंतर धर्मेंद्र कश्यप यांनी आपल्या अधिकृत फेसबुक अकाऊंटवरून “टाटा-बाय-बाय” अशी एक ओळीची पोस्ट शेअर केली. त्यांची ही पोस्ट वाऱ्यासारखी पसरताच पक्षातील कार्यकर्त्यांमध्ये खळबळ उडाली असून त्यांच्या समर्थकांनी निवासस्थानी गर्दी करण्यास सुरुवात केली आहे. या पोस्टचा थेट अर्थ ते भाजपला रामराम ठोकणार असाच काढला जात आहे. राजकीय वर्तुळातील सूत्रांनुसार, ते लवकरच समाजवादी पक्षाच्या (SP) किंवा इतर एखाद्या मोठ्या पक्षाच्या वरिष्ठ नेत्यांची भेट घेऊन प्रवेश करू शकतात.
कंधरापूर भागातून राजकारणात दीर्घकाळ सक्रिय असणारे धर्मेंद्र कश्यप हे आपली मुलगी किर्ती कश्यप हिला राजकारणात आणण्यासाठी प्रयत्नशील होते. तिची उमेदवारी निश्चित व्हावी यासाठी त्यांनी मोठी राजकीय मोर्चेबांधणी केली होती. परंतु, पक्षश्रेष्ठींकडून प्रतिसाद न मिळाल्यामुळे ते प्रचंड निराश झाले आहेत.
धर्मेंद्र कश्यप यांचा राजकीय प्रवास पाहता, त्यांनी 2002 मध्ये बहुजन समाज पक्षाच्या तिकिटावर आमदार म्हणून विधानसभेत प्रवेश केला होता. त्यानंतर 2003 मध्ये त्यांनी समाजवादी पक्षात प्रवेश केला व राज्यमंत्री म्हणून जबाबदारी सांभाळली. 2009 च्या लोकसभा निवडणुकीत आंवला (बरेली) मतदारसंघातून भाजपच्या उमेदवार मनेका गांधी यांच्याकडून त्यांना थोड्या फरकाने पराभव पत्करावा लागला होता.
त्यानंतर त्यांनी भाजपमध्ये प्रवेश केला. 2014 आणि 2019 च्या लोकसभा निवडणुकांमध्ये ते भाजपच्या तिकिटावर खासदार म्हणून निवडून आले. तथापि, 2024 च्या लोकसभा निवडणुकीत समाजवादी पक्षाचे उमेदवार नीरज मौर्य यांनी त्यांचा 15,970 मतांनी पराभव केला. तेव्हापासून ते आपल्या मुलीच्या राजकीय भविष्यासाठी सातत्याने प्रयत्न करत होते. आता राज्यसभेची संधीही हुकल्याने त्यांनी पक्षाला बाय-बाय करण्याचे स्पष्ट संकेत दिले आहेत.
