पुणे : मागील काही महिन्यापासून सोन्या -चांदीच्या दरात मोठे फेरबदल होत असताना आज ग्राहकांना मोठा दिलासा मिळाला आहे.जळगावच्या प्रसिद्ध सराफा बाजारात सोने आणि चांदीच्या किमतीत लक्षणीय घसरण झाली आहे.आज जळगावात 10 ग्रॅम (1 तोळा) 24 कॅरेट सोन्याचा भाव साधारणपणे 1,41,000 रुपयांवर आला आहे. तर दुसऱ्या बाजूला, चांदीचा दर प्रति किलो 2,22,000 रुपये एवढा नोंदवला गेला आहे.
आंतरराष्ट्रीय पातळीवरील घडामोडींमुळे सध्या बाजारात मोठे चढ-उतार होत असून, याचा थेट फायदा भारतीय ग्राहकांना होताना दिसत आहे.विशेष म्हणजे, 24 कॅरेट सोन्याच्या दरात एकाच दिवसात तब्बल 1,100 ते 1,000 रुपयांची घसरण झाली असून, काही ठिकाणी तोळा सोन्याचा भाव 1,42,800 रुपयांच्या आसपास स्थिरावला आहे. चांदीचे दर मात्र सध्या स्थिर असून 100 ग्रॅम चांदीसाठी 23,500 रुपये मोजावे लागत आहेत.
गेल्या एका आठवड्याचा विचार केला, तर सोने आणि चांदीच्या दरामध्ये खूप मोठी घसरण झाली आहे. अवघ्या 7 दिवसांत सोने तब्बल 5,000 रुपयांनी स्वस्त झाले आहे. तर चांदीच्या दरात तर मोठी घसरण झाली असून, प्रति किलो मागे तब्बल 16,000 रुपयांची घट नोंदवली गेली आहे. त्यामुळे लग्नकार्यासाठी किंवा गुंतवणुकीसाठी दागिने खरेदी करणाऱ्यांसाठी ही सुवर्णसंधी मानली जात आहे.
सराफा बाजारातील तज्ज्ञ आणि व्यावसायिकांच्या मते, सध्या जागतिक पातळीवर सुरू असणारी राजकीय अनिश्चितता या घसरणीला कारणीभूत आहे. प्रामुख्याने अमेरिका आणि इराण यांच्यातील युद्धजन्य परिस्थिती आणि आंतरराष्ट्रीय बाजारातील हालचालींमुळे मौल्यवान धातूंच्या किमतींवर मोठा दबाव निर्माण झाला आहे. जोपर्यंत जागतिक पातळीवरील हे तणावाचे वातावरण निवळत नाही, तोपर्यंत सोन्या-चांदीच्या दरात असेच चढ-उतार होत आहेत . त्यामुळे सध्याची घसरण गुंतवणूकदारांसाठी फायद्याची ठरू शकते.
