शिक्रापूर : मोबाईल हरवल्यानंतर तो पुन्हा मिळेल की नाही, याची चिंता अनेकांना सतावत असते. मात्र, शिक्रापूर पोलिसांनी अशाच नागरिकांना दिलासा देत हरवलेले आणि गहाळ झालेले 29 मोबाईल शोधून काढले आहेत. सुमारे 14 लाख रुपये किमतीचे हे मोबाईल त्यांच्या मूळ मालकांना परत करण्यात आले. पोलिसांनी तांत्रिक तपासाच्या मदतीने केलेल्या या कामगिरीमुळे नागरिकांमध्ये समाधान व्यक्त होत आहे.
शिक्रापूर पोलीस ठाण्याच्या हद्दीत 2026 मध्ये मोबाईल हरवल्याच्या अनेक तक्रारी दाखल झाल्या होत्या. या तक्रारींची दखल घेत पोलीस निरीक्षक चंद्रशेखर यादव यांनी मोबाईल शोधण्यासाठी विशेष प्रयत्न करण्याच्या सूचना गुन्हे शोध पथकाला दिल्या. त्यानंतर पोलीस हवालदार शिवाजी चितारे यांनी तांत्रिक माहितीच्या आधारे मोबाईलचा शोध घेण्यास सुरुवात केली.
हरवलेले मोबाईल शोधण्यासाठी पोलिसांनी केंद्र सरकारच्या CEIR पोर्टलचा वापर केला. पोलीस ठाण्यात दाखल झालेल्या तक्रारींमधील माहिती तपासून संबंधित मोबाईलचा माग काढण्यात आला. तांत्रिक विश्लेषण आणि पोलिसांच्या प्रयत्नांमुळे एकूण 29 मोबाईल शोधण्यात यश आले. त्यानंतर हे मोबाईल त्यांच्या मूळ मालकांच्या ताब्यात देण्यात आले.
मोबाईलमध्ये वैयक्तिक माहिती, महत्त्वाचे संपर्क क्रमांक तसेच बँकिंग आणि दैनंदिन व्यवहारांशी संबंधित तपशील असतात. त्यामुळे फोन हरवल्यास नागरिकांना आर्थिक आणि वैयक्तिक अडचणींचा सामना करावा लागू शकतो. अशा वेळी हरवलेला मोबाईल पुन्हा मिळाल्याने संबंधित नागरिकांना मोठा दिलासा मिळाला आहे.
पुणे ग्रामीणचे पोलीस अधीक्षक संदीपसिंह गिल्ल, अपर पोलीस अधीक्षक डॉ. शुभम कुमार आणि शिरूरचे उपविभागीय पोलीस अधिकारी रवींद्र भोसले यांच्या मार्गदर्शनाखाली ही कारवाई करण्यात आली. पोलीस निरीक्षक चंद्रशेखर यादव आणि पोलीस हवालदार शिवाजी चितारे यांच्यासह नारायण वाळके व विकास नगर यांच्या पथकाने या कामगिरीत सहभाग घेतला. हरवलेले 29 मोबाईल शोधून सुमारे 14 लाख रुपयांचा मुद्देमाल परत केल्याने शिक्रापूर पोलिसांच्या कामगिरीचे कौतुक होत आहे.
