लोणी काळभोर: महाराष्ट्र सरकारने 2012 पासून गुटखा, (Loni Kalbhor) पान मसाला, आणि तंबाखू मिश्रित (Pune News) पदार्थांच्या उत्पादन, विक्री, साठवणूक आणि वितरणावर बंदी घातली आहे. परंतु, पुणे शहर पोलिसांच्या अंमली पदार्थ विरोधी पथक 2 च्या पथकाने लोणी काळभोर (ता.हवेली) येथील पाटीलवस्ती परिसरात छापा गुरुवारी (ता.4) पहाटे पाच वाजण्याच्या सुमारास टाकला. या छाप्यात पोलिसांनी बनावट आर.एम.डी. गुटख्याच्या कारखान्याचे मोठे रॅकेट उध्वस्त केले आहे. गुटखा बंदी असतानादेखील पुण्यासह राज्यभर गुटखा विक्री जोरदार सुरु असल्याची दाट शक्यता आहे. त्यामुळे गुटखाबंदी नेमकी कोणासाठी? असा सवाल नागरिकांनी उपस्थित केला आहे.
सुमित गुप्ता व रोहित दुर्गाप्रसाद गुप्ता या दोघांनी लोणी काळभोर येथील पाटीलवस्ती परिसरात दोन गोडावून व शेतातील घर भाड्याने घेतले होते. ‘आलेला माल खाली करण्यासाठी व ऑर्डर आल्यानंतर माल पुन्हा गाडीत भरण्यासाठी कामगार एका खोलीत राहणार आहे’ असे गोडावून व शेतमालकाला सांगितले होते. परंतु, कामगार हे रात्रीच्या वेळी मशीन चालू करून रात्रभर आर.एम.डी. व विमल गुटख्यात मिक्स करण्यासाठी सुगंधित तंबाखूच्या पुड्या तयार करत होते आणि पहाट झाली की मशीन बंद केली जात होती.
दररोज रात्रीच्या वेळी गाड्या येत होत्या व रात्रीच्याच वेळी माल घेऊन परत जात होत्या. सुमित गुप्ता व रोहित दुर्गाप्रसाद गुप्ता यांच्याकडून कामगारांना जीवनाश्यक वस्तू जागेवर पुरवल्या जात होत्या. कामगारांना दिवसा बाहेर न पडण्याच्या सूचना त्यांनी दिल्या होत्या. त्यानुसार कामगारही बाहेर पडत नव्हते. त्यामुळे मागील तीन महिन्यांपासून बनावट गुटखा बनविण्याचे काम जोराने सुरु होते. राज्यातील अनेक जिल्ह्यात हा माल पुरविला जात होता. या अवैध धंद्याबाबत कोणालाही माहिती नव्हती. परंतु, अंमली पदार्थ विरोधी पथक क्र दोनचे पोलिस निरीक्षक सुदर्शन गायकवाड व त्यांच्या सहकाऱ्यांना या अवैध गुटखा बनवणाऱ्या कारखान्याची चाहूल लागली आणि त्यांनी थेट त्या ठिकाणी धाड टाकली. या छाप्यात पोलिसांनी 4 जणांना अटक करून सुमारे 1 कोटी रुपयांचा मुद्देमाल जप्त केला आहे.
दरम्यान, पानटपऱ्या, किराणा दुकान व चहाचे स्टाॅलमधून गुटखा विक्री राजरोसपणे सुरु आहे. प्रशासन कारवाई करत नसल्याने गुटखा विक्री बंदीचा कायदा नावालाच दिसून येत आहे. गुटखा बंदी प्रभावी करण्यासाठी प्रशासनाने कडक पावले उचलावी लागणार आहेत. गुटखा बंदी करणे हे प्रशासनासमोर सर्वांत मोठे आव्हान सध्या उभे राहिले आहे.
लोणी काळभोर येथील मुख्य गुटखा किंग पोलिसांच्या रडारवर
गुटखा बंदी कायदा हा तंबाखूजन्य पदार्थांच्या सेवनामुळे होणारे दुष्परिणाम टाळण्यासाठी महत्त्वाचा आहे. परंतु, मागील काही महिन्यांपासून लोणी काळभोरला दररोज ट्रकभरून गुटखा मागविला जात आहे. तसेच या गुटख्याची टपरी व दुकानांनी खुलेआम विक्री केली जात आहे. लोणी काळभोर येथील मुख्य गुटखा किंग हा पडद्यामागचा विलन असून तो अद्यापपर्यंत समोर आलेला नाही. परंतु,तो पोलिसांच्या रडारवर आला आहे. अशी पोलिसांमध्ये दबक्या आवाजात चर्चा सुरु आहे.
नायगाव रस्त्यावरही गुटख्याचे गोडाऊन
बनावट गुटखा बनवणाऱ्या कारखान्याची कोणालाही माहिती मिळू नये. व सुरक्षेच्या दृष्टीकोनातून गुप्ता यांनी थेऊर नायगाव रस्त्यावर एक भले मोठे गोडाऊन घेतले आहे. या गोडाऊनमध्ये मोठ्या प्रमाणात गुटख्याचा साठा केला जातो व याच गोडाऊनमधून मधून गुटख्याची डिलिव्हरी मोठ्या प्रमाणात केली जाते. परंतु, पोलीस प्रशासनाने या गोडाऊनवर कारवाई केलेली नाही. अशी नागरिकांमध्ये जोरदार चर्चा रंगली आहे.
अन्न आणि औषध प्रशासनाच्या कार्यक्षमतेवर प्रश्नचिन्ह
गुटखा, पान मसाला आणि तंबाखू मिश्रित पदार्थ व नशायुक्त पानाच्या बातम्या अनेक वृत्तपत्रांमधुन प्रसिद्ध झाल्या आहेत. तरुणांच्या ऊज्वल भविष्यासाठी अन्न आणि औषध प्रशासनाचे अशा टपऱ्यांची माहिती घेऊन त्यांच्यावर त्वरित कारवाई करणे अपेक्षित आहे. मात्र प्रशासनाकडून कारवाईची बडगा उगारला नसल्याचे दिसून येत आहे. प्रशासन या प्रश्नांवर गंभीर नसल्याचे दिसून येत आहे. त्यामुळे पुणे अन्न आणि औषध प्रशासनाच्या कार्यक्षमतेवर नागरिकांकडून प्रश्नचिन्ह उपस्थित करण्यात येत आहे.
