पुणे : घरगुती वापरासाठी असलेल्या गॅस सिलेंडरमधील गॅस हायड्रोलिक पाइपच्या साहाय्याने लहान व व्यावसायिक सिलेंडरमध्ये भरून त्याची चढ्या दराने विक्री करण्याचा अवैध व्यवसाय गुन्हे शाखा युनिट-4 ने उघडकीस आणला आहे. धानोरी येथील टिंगरेनगर परिसरात केलेल्या या कारवाईत पोलिसांनी 80 हजार 600 रुपयांचे गॅस सिलेंडर आणि रिफिलिंगचे साहित्य जप्त केले असून, दोघांविरुद्ध गुन्हा दाखल केला आहे.
पोलिसांनी दिलेल्या माहितीनुसार, गुन्हे शाखा युनिट-4 च्या वरिष्ठ पोलीस निरीक्षक कांचन जाधव यांच्या आदेशानुसार पथक 13 नोव्हेंबर रोजी विश्रांतवाडी पोलीस ठाण्याच्या हद्दीत गस्त घालत होते. यावेळी पोलीस अंमलदार अनिकेत भोसले यांना टिंगरेनगर-धानोरी रोडवरील हरेकृष्णा पार्क परिसरात धनलक्ष्मी इलेक्ट्रॉनिक्स दुकानाजवळील एका पडक्या शेडमध्ये अवैध गॅस रिफिलिंग सुरू असल्याची माहिती मिळाली.
त्यानुसार पोलीस उपनिरीक्षक दिग्विजय चौगले यांच्या पथकाने पंचांसह सायंकाळी छापा टाकला. त्यावेळी हीराराम पिलाराम चौधरी (वय 43) हा घरगुती गॅस सिलेंडरमधून दुसऱ्या सिलेंडरमध्ये गॅस भरताना रंगेहात आढळला. चौकशीत हा व्यवसाय मालक नारायणलाल मांगीलाल चौधरी (वय 42) याच्या सांगण्यावरून सुरू असल्याचे समोर आले. या व्यवसायासाठी कोणताही अधिकृत परवाना नसल्याचेही तपासात निष्पन्न झाले. पोलिसांनी घटनास्थळावरून एचपी कंपनीचे घरगुती व व्यावसायिक सिलेंडर, कॅबसन्स कंपनीचे 15 छोटे सिलेंडर, सहा गॅस फिलर, इलेक्ट्रिक वजनकाटा, हायड्रोलिक पाइप आणि अन्य साहित्य असा एकूण 80 हजार 600 रुपयांचा मुद्देमाल जप्त केला.
घरगुती वापरासाठीच्या गॅसचा विनापरवाना साठा करून रहिवासी भागात असुरक्षित पद्धतीने रिफिलिंग आणि विक्री सुरू असल्याने नागरिकांच्या जीविताला व मालमत्तेला धोका निर्माण होऊ शकत होता. याप्रकरणी भारतीय न्याय संहितेतील कलम 287, 288, 289, 290 तसेच जीवनावश्यक वस्तू अधिनियम आणि स्फोटक पदार्थ अधिनियमांतर्गत दोघांविरुद्ध कायदेशीर कारवाई करण्यात आली आहे. ही कारवाई वरिष्ठ पोलीस निरीक्षक कांचन जाधव यांच्या मार्गदर्शनाखाली पोलीस उपनिरीक्षक दिग्विजय चौगले, पोलीस हवालदार नितीन साबळे व पथकाने केली.
