लोणी काळभोर : पुणे शहरात पोलीस आयुक्त अमितेश कुमार यांनी अवैध धंदेचालकांविरोधात कठोर भूमिका घेत मोका, एमपीडीए आणि तडीपारीसारख्या कारवायांचा धडाका लावला आहे. त्यामुळे अवैध धंदेचालकांचे धाबे दणाणले असताना, पुण्याच्या पूर्व भागातील उरुळी कांचन पोलीस ठाण्याच्या हद्दीत मात्र अवैध धंद्यांचे जाळे दिवसेंदिवस विस्तारत असल्याचे चित्र समोर येत आहे. शहरात कारवाईचा धडाका आणि ग्रामीण भागात अवैध धंद्यांना मोकळे रान, असा विरोधाभास निर्माण झाला आहे. विशेष म्हणजे, या धंद्यांना कोणाचे अभय आहे आणि स्थानिक पोलीस प्रशासन नेमके करतेय तरी काय, असा संतप्त सवाल नागरिक उपस्थित करत आहेत.
सोरतापवाडी बनतेय अवैध धंद्यांचे केंद्र?
उरुळी कांचन पोलीस ठाण्याच्या हद्दीत गांजा विक्री, हातभट्टीची दारू, हॉटेलमधून अवैध दारूविक्री, वेश्याव्यवसाय, मटका-जुगार आणि पत्त्यांचे क्लब खुलेआम सुरू आहेत. या अवैध धंद्यांमधून दररोज लाखो रुपयांची उलाढाल होत असून अवैध धंदेचालकांकडून लाखो रुपयांचे हप्ते गोळा केले जात असल्याची जोरदार चर्चा नागरिकांमध्ये सुरू आहे. सोरतापवाडी येथे एका मटकाकिंगने पोलीस प्रशासनाला हाताशी धरून राजरोसपणे मटका-जुगार सुरू आहे. तर वाकडा पूलाजवळ असलेल्या एका लॉज’मधून देहविक्रीचा खुलेआम व्यवसाय सुरू आहे. त्यामुळे सध्या सोरतापवाडी हे अवैध धंद्यांचे केंद्र बनत चालले आहे का, असा प्रश्न उपस्थित होत आहे.
उरुळी कांचन बाजार मैदानात चार मटक्यांचे अड्डे
उरुळी कांचन गावातील बाजार मैदान परिसरात चार ठिकाणी मटका-जुगार सुरू आहे. पुणे प्राईम न्यूजने केलेल्या पाहणीदरम्यान या परिसरातील कथित मटका व्यवसायाचे व्हिडिओ समोर आले आहेत. तसेच ए.के. लॉजमधील कथित देहविक्री व्यवसायासंदर्भातील व्हिडिओही समोर आला आहे. या प्रकारांमुळे परिसरातील कायदा-सुव्यवस्थेचा प्रश्न ऐरणीवर आला आहे.
दोन दिवस धंदा बंद, नंतर पुन्हा सुरू; कारवाई की केवळ फार्स?
वाकड्या पुलाजवळील लॉजमधील कथित देहविक्री व्यवसायासंदर्भातील व्हिडिओ प्रसिद्ध झाल्यानंतर संबंधित व्यवसाय दोन दिवस बंद ठेवण्यास सांगितले जात असल्याची चर्चा आहे. त्यानंतर पुन्हा व्यवसाय सुरू होत असल्याचा आरोप केला जात आहे. जर हे आरोप खरे असतील, तर केवळ दोन दिवस धंदा बंद ठेवून पुन्हा सुरू करण्याचा प्रकार म्हणजे कायद्याची उघडपणे थट्टा नाही का? अवैध धंदेचालकांमध्ये कायद्याचा धाक उरला आहे की नाही, असा सवाल उपस्थित होत आहे.
एसपी गिल साहेब, आता चौकशीचा बडगा उगारा!
जिल्हा पोलीस अधीक्षक संदीपसिंह गिल यांनी या संपूर्ण प्रकरणाची गांभीर्याने दखल घ्यावी, अशी मागणी नागरिकांकडून होत आहे. उरुळी कांचन पोलीस ठाण्याच्या हद्दीत सुरू असल्याचा आरोप असलेल्या अवैध धंद्यांची स्वतंत्र पथकामार्फत तपासणी करावी. संबंधित पोलीस अधिकारी आणि कर्मचाऱ्यांचे अवैध धंदेचालकांशी आर्थिक हितसंबंध आहेत का, याची निष्पक्ष चौकशी करावी. आवश्यकतेनुसार कॉल डिटेल रेकॉर्ड (सीडीआर), आर्थिक व्यवहार आणि इतर संबंधित पुराव्यांची कायदेशीर पद्धतीने तपासणी करावी. दोषी आढळणाऱ्या अधिकारी-कर्मचाऱ्यांवर कठोर कारवाई करावी, अशी मागणी होत आहे.
अवैध धंदेचालकांना कायद्याचा धाक दाखवणार कोण?
एकीकडे वरिष्ठ पोलीस अधिकारी अवैध धंद्यांविरोधात कठोर कारवाईचे आदेश देत असताना, दुसरीकडे स्थानिक पातळीवर असे धंदे सुरू असल्याचे आरोप होत असतील, तर ही बाब पोलीस प्रशासनासाठी निश्चितच चिंताजनक आहे. अवैध धंदेचालकांवर कारवाई करण्याऐवजी त्यांना अप्रत्यक्ष संरक्षण मिळत असल्याचा संशय नागरिकांमध्ये निर्माण होत असेल, तर तो दूर करण्याची जबाबदारी पोलीस प्रशासनाचीच आहे. अन्यथा, नागरिकांचा पोलिसांवरील विश्वास डळमळीत होण्यास वेळ लागणार नाही.
दरम्यान, उरुळी कांचन पोलीस ठाण्याच्या हद्दीत अवैध धंदे सुरू असल्याचे व्हिडिओ आणि आरोप समोर येत असताना वरिष्ठ पोलीस प्रशासन कारवाईची वाट का पाहत आहे? या धंद्यांचे खरे सूत्रधार कोण आणि त्यांना कोणाचे अभय आहे? असा सवाल पुणे प्राईम न्यूजचा पोलीस प्रशासनाला आहे.
View this post on Instagram
