पुणे : अमली पदार्थ तस्करीच्या आरोपाखाली तेलंगणा राज्यात 12 किलो गांजासह अटक करण्यात आलेल्या पुणे शहर पोलिस दलातील कर्मचाऱ्यावर अखेर बडतर्फीची कारवाई करण्यात आली आहे. नितीन ज्ञानू शिंदे असे बडतर्फ करण्यात आलेल्या पोलिस अंमलदाराचे नाव आहे.
पुणे शहर पोलिस दलाचे अतिरिक्त पोलिस आयुक्त (प्रशासन) संजय पाटील यांनी यासंदर्भातील आदेश जारी केला आहे. शिंदे हे विश्रामबाग वाहतूक विभागात कार्यरत होते. त्यांनी 7 ऑक्टोबर 2026 पासून आजारपणाचे कारण देत रजा घेतली होती. मात्र, याच काळात ते अमली पदार्थांच्या तस्करीत सहभागी असल्याचा प्रकार उघडकीस आला.
25 ऑक्टोबर रोजी तेलंगणातील वारंगल जिल्ह्यातील नेक्कोंडा पोलिस ठाण्याच्या हद्दीत स्थानिक पोलिसांनी शिंदे यांना 12 किलो गांजासह ताब्यात घेतले. त्यांच्याविरुद्ध अमली पदार्थ प्रतिबंधक कायद्यानुसार (एनडीपीएस) गुन्हा दाखल करून अटक करण्यात आली होती. या घटनेची माहिती मिळाल्यानंतर विश्रामबाग वाहतूक विभागाच्या प्रभारी अधिकाऱ्यांनी वरिष्ठांना अहवाल सादर केला. पोलिस दलात कार्यरत असताना अमली पदार्थ तस्करीसारख्या गंभीर प्रकरणात नाव आल्याने शिंदे यांच्या वर्तनाची दखल वरिष्ठ अधिकाऱ्यांनी घेतली.
दरम्यान, शिंदे यांचे कृत्य पोलिस दलाची प्रतिमा मलीन करणारे असून, त्यामुळे जनतेच्या विश्वासाला तडा जात असल्याचे निरीक्षण अतिरिक्त पोलिस आयुक्तांनी आदेशात नोंदवले आहे. या पार्श्वभूमीवर त्यांना शासकीय सेवेतून बडतर्फ करण्याचा निर्णय घेण्यात आला.
