बीड : सोलापूरमधील एमआयडीसी पोलीस ठाण्यात बीड जिल्ह्यातील वाल्मिक कराडचा मुलगा सुशील कराड आणि त्याच्या दोन सहकाऱ्यांवर (अनिल मुंडे व गोपी गंजेवार) अत्यंत गंभीर गुन्ह्यांची नोंद करण्यात आली आहे. मुंबई उच्च न्यायालयाच्या मध्यस्थी आणि आदेशानंतर हा गुन्हा दाखल झाला आहे.
तक्रारदार महिला सोलापूरची रहिवासी असून तिचे पती सुशील कराडकडे काम करत होते. दरम्यान, या महिलेने स्वतःचा ट्रान्सपोर्टचा व्यवसाय सुरू करून बँकेच्या कर्जावर दोन बलकर ट्रक, दोन कार आणि दोन दुचाकी खरेदी केल्या होत्या. याशिवाय परळी वैजनाथ येथील जलालपूर परिसरात 30 लाख रुपयांचा एक प्लॉटही घेतला होता. कर्मचाऱ्याच्या कुटुंबाची झालेली ही आर्थिक प्रगती आरोपींना सहन झाली नाही. व्यवसाय बंद करून सर्व मालमत्ता आपल्या नावावर करण्यासाठी आरोपींनी पीडित कुटुंबाला धमकावण्यास व त्रास देण्यास सुरुवात केली.
मे 2024 मध्ये आरोपींनी पीडितेच्या पतीला डांबून ठेवत बेदम मारहाण केली आणि बंदुकीचा धाक दाखवून सर्व वाहनांच्या चाव्या व कागदपत्रे हिसकावून घेतली. त्यानंतर 7 मे 2024 रोजी तिन्ही आरोपींनी पीडितेच्या घरात जबरदस्तीने प्रवेश केला. पतीला वाचवण्यासाठी पुढे आलेल्या त्यांच्या 9 वर्षांच्या अल्पवयीन मुलीच्या डोक्याला रिव्हॉल्व्हर लावून तिला ढकलून दिले आणि तिचे कपडे फाडून तिचा विनयभंग केला.
आरोपींनी पिस्तुलाचा धाक दाखवून परळी येथील रजिस्ट्रार कार्यालयात पीडित कुटुंबाकडून 30 लाख रुपयांचा प्लॉट अनिल मुंडेच्या नावावर हस्तांतरित करून घेतला. इतकेच नाही तर 17 मे रोजी घरातील सोन्याची अंगठी विकायला लावून 1 लाख 33 हजार रुपये रोख रक्कम बळजबरीने लाटली.
या त्रासाला कंटाळून पीडित कुटुंबाने बीडला जाऊन वाल्मिक कराडची भेट घेण्याचा प्रयत्न केला, मात्र आरोपी गोपी गंजेवार याने पुन्हा घरात घुसून जीवे मारण्याची धमकी दिली. स्थानिक पोलिसांनी सुरुवातीला तक्रार न घेतल्याने पीडितेने उच्च न्यायालयात धाव घेतली. उच्च न्यायालयाच्या कडक भूमिकेनंतर सोलापूर एमआयडीसी पोलिसांनी या प्रकरणी गुन्हा नोंदवून तपासाला सुरुवात केली आहे.
