Holi 2026 : होळी आणि धुळवडीचा उत्साह ओसंडून वाहत असताना कायदा-सुव्यवस्थेला धक्का लागू नये यासाठी मुंबई पोलीस सतर्क झाले आहेत. रंगांच्या या सणात दरवर्षी किरकोळ वाद, छेडछाड, मद्यधुंद वाहनचालक आणि सोशल मीडियावरील भडक पोस्ट्समुळे तणाव निर्माण होण्याच्या घटना घडतात. यंदा अशा प्रकारांना आळा घालण्यासाठी शहरभर कडक बंदोबस्त ठेवण्याचे आदेश देण्यात आले आहेत. (Holi 2026)
मुंबईत सार्वजनिक ठिकाणी मोठ्या प्रमाणावर होळ्या पेटवल्या जातात आणि धुळवडीला रस्त्यावर रंग खेळला जातो. गर्दीच्या ठिकाणी रंगीत पाणी फेकणे, अश्लील हावभाव किंवा जबरदस्तीने रंग लावणे यामुळे भांडणे होण्याची शक्यता असते. काही ठिकाणी वर्गणीच्या वादातूनही तणाव वाढतो. हे टाळण्यासाठी सर्व पोलिस ठाण्यांना सतर्क राहण्याच्या सूचना देण्यात आल्या आहेत. गुन्हेगारी पार्श्वभूमी असलेल्या व्यक्तींवर प्रतिबंधक कारवाई, तसेच सार्वजनिक शांततेला बाधा आणणाऱ्यांवर हद्दपारीची कारवाई केली जाणार आहे.
समुद्रकिनारे, चौपाट्या, उद्याने, प्रमुख चौक आणि मोठ्या होळ्यांची ठिकाणे येथे अतिरिक्त पोलीस बंदोबस्त तैनात असेल. विशेषतः मिश्र वस्त्यांमध्ये तणाव निर्माण होऊ नये यासाठी गस्त वाढवली जाणार आहे. महिलांशी गैरवर्तन, छेडछाड किंवा मारामारीचे प्रकार रोखण्यासाठी सिव्हिल कपड्यातील पथकेही तैनात राहतील.
मद्यपान करून धिंगाणा घालणाऱ्यांवर कडक कारवाई होणार आहे. शहरातील विविध भागांत नाकाबंदी करून ‘ड्रिंक अँड ड्राइव्ह’विरोधात विशेष मोहिम राबवली जाणार आहे. नियम तोडणाऱ्यांवर दंडात्मक कारवाईसोबत गुन्हेही दाखल होऊ शकतात.
पर्यावरणाच्या दृष्टीनेही खबरदारी घेण्याचे आवाहन करण्यात आले आहे. होळीसाठी बेकायदा वृक्षतोड करू नये, पादचाऱ्यांवर जबरदस्तीने रंग किंवा पाण्याचे फुगे फेकू नयेत, समाजमाध्यमांवर जातीय तेढ निर्माण करणाऱ्या पोस्ट टाकू नयेत, तसेच लाऊडस्पीकरच्या आवाजाची मर्यादा पाळावी, असे आवाहन करण्यात आले आहे.
होळी हा आनंद आणि एकोप्याचा सण आहे. काहींच्या बेजबाबदार वर्तनामुळे संपूर्ण सणाला गालबोट लागू नये, यासाठी प्रशासनासोबत नागरिकांनीही सामाजिक भान राखणे तितकेच महत्त्वाचे आहे. सुरक्षित आणि संयमी साजरी केलेली होळीच खऱ्या अर्थाने रंगतदार ठरेल.
