पुणे : खराडी परिसरात दोन विवाहित महिलांनी सासरच्या मंडळींकडून मानसिक व शारीरिक छळ, पैशांची मागणी, मारहाण आणि धमकावल्याचे आरोप करत खराडी पोलिस ठाण्यात स्वतंत्र तक्रारी दाखल केल्या आहेत. दोन्ही घटना वेगवेगळ्या कालावधीतील असून, एका महिलेने 2013 पासून छळ होत असल्याचा आरोप केला आहे, तर दुसऱ्या महिलेने जून 2025 पासून पैशांसाठी त्रास देण्यात आल्याचे तक्रारीत नमूद केले आहे.
पहिल्या प्रकरणातील 36 वर्षीय महिलेचे 30 मे 2013 रोजी विनय सालके यांच्याशी लग्न झाले. लग्नानंतर सासरच्या मंडळींकडून घरखर्चासाठी पैशांची मागणी होत असल्याचा आरोप तिने केला आहे. नोकरी सोडून पुण्यात आल्यानंतर घरकाम आणि आर्थिक बाबींवरून वारंवार वाद होत असल्याचेही तक्रारीत नमूद आहे. 2015 मध्ये पतीसह घराबाहेर काढल्याचा, तर 2016 मध्ये पतीने मारहाण केल्याचा आरोप महिलेने केला आहे.
गर्भावस्थेत तसेच मुलगी झाल्यानंतरही मानसिक व शारीरिक त्रास देण्यात आल्याचे तिने सांगितले. तसेच तिच्या हालचालींवर लक्ष ठेवण्यासाठी वाहनात जीपीएस व कॅमेरा बसविण्यात आल्याचा आणि मोबाईलमध्ये लोकेशन ट्रॅकिंग ॲप्स टाकल्याचा आरोपही तिने केला आहे. 2019 मध्ये केसनंद येथे फ्लॅट आणि 2021 मध्ये चऱ्होली-आळंदी रोड परिसरात दुसरा फ्लॅट घेण्यात आला. या दोन्ही मालमत्तांच्या कर्जाचे हप्ते आपण भरत असल्याचा दावा महिलेने केला आहे. 2025 मध्ये पतीने घटस्फोटाची नोटीस पाठविल्याचेही तिने पोलिसांना सांगितले.
दुसऱ्या प्रकरणातील 26 वर्षीय महिलेचे अजय लकडे यांच्याशी 12 जून 2025 रोजी लग्न झाले. लग्नानंतर अवघ्या पाच दिवसांनी, म्हणजे 17 जून 2025 रोजी, सासरच्या मंडळींनी पूजेसाठी माहेरून पाच हजार रुपये आणण्यास सांगितल्याचा आरोप तिने केला आहे. त्यानंतर पतीकडून कर्ज व व्याजाचे पैसे भरण्यासाठी वारंवार पैशांची मागणी होत असल्याचे तक्रारीत नमूद आहे. जून 2025मध्येच पतीने गळा दाबून, चापट मारून व शिवीगाळ करून मारहाण केल्याचा आरोप महिलेने केला आहे.
तसेच 10 जुलै 2025 रोजी पतीने फोन करून घरातून निघून जाण्यास सांगत मारून टाकण्याची धमकी दिल्याचा दावा तिने केला आहे. त्यानंतर सासरच्या मंडळींनी कपडे बॅगेत भरून तिला घराबाहेर काढल्याचे तक्रारीत म्हटले आहे. 16 नोव्हेंबर 2025 रोजी सासू व तिच्या मैत्रिणीने माहेरी येऊन शिवीगाळ केल्याचा, तर 15 जून 2026 रोजी सासू व दोन जावांनी आईला शिवीगाळ करून मारहाण केल्याचा आरोपही महिलेने केला आहे. या दोन्ही प्रकरणांत पतीसह सासरच्या मंडळींविरुद्ध कायदेशीर कारवाईची मागणी करण्यात आली असून, पुढील तपास खराडी पोलिस करीत आहेत
