लोणी काळभोर, ता. 19 : कदमवाकवस्ती (ता. हवेली) येथील गणपत दौलतराव चावट यांची राष्ट्रवादी काँग्रेस पक्ष शरदचंद्र पवार गटाच्या जेष्ठ नागरीक सेलच्या प्रदेश उपाध्यक्षपदी निवड करण्यात आली आहे. चावट यांच्या निवडीमुळे जेष्ठ मंडळींमध्ये आनंदाचे व नवचैतन्याचे वातावरण पसरले आहे.
मुंबई येथील राष्ट्रवादी भवन बलाई इस्टेट येथे राष्ट्रवादीचा (शरदचंद्र पवार गट) एक कार्यक्रम सोमवारी (ता.18)पार पडला. या कार्यक्रमात आमदार रोहित पवार यांच्याहस्ते गणपत चावट यांना निवडीचे पत्र देऊन सत्कार करण्यात आला. यावेळी राष्ट्रवादीच्या जेष्ठ नागरीक सेल प्रदेशाध्यक्ष बापूसाहेब उर्फ सोनबा चौधरी, पश्चिम विभाग प्रमुख तानाजी घारे, पुणे जिल्हाध्यक्ष शिवाजी कांचन, सेवानिवृत्त उपविभागीय पोलीस अधिकारी तथा जालना जेष्ठ नागरीक सेलचे जिल्हाध्यक्ष दीपक शिंत्रे, सांगली जिल्हाध्यक्ष गजानन पाटील, धनंजय कदम व राष्ट्रवादीचे पदाधिकारी व कार्यकर्ते मोठ्या संख्येने उपस्थित होते.
दरम्यान, गणपत चावट यांनी राष्ट्रवादी काँग्रेस पक्षासोबत (शरदचंद्र पवार) असलेली बांधिलकी आणि आत्तापर्यंत सामाजिक व राजकीय क्षेत्रात केलेल्या प्रामाणिक कार्याची पक्षाने नोंद घेतली आहे. त्यामुळे पक्षाने चावट यांची जेष्ठ नागरीक सेलच्या प्रदेश उपाध्यक्षपदी निवड करण्यात आली आहे.
यावेळी ‘पुणे प्राईम न्यूज’शी बोलताना राष्ट्रवादीच्या जेष्ठ नागरीक सेलचे नवनिर्वाचित प्रदेश उपाध्यक्ष गणपत चावट म्हणाले की, राष्ट्रवादी काँग्रेस पक्ष शरदचंद्र पवार या पक्षाचे संस्थापक, देशाचे नेते आदरणीय शरदचंद्रजी पवार साहेब यांनी माझ्यावर विश्वास ठेवून खूप मोठी जबाबदारी दिली आहे. त्याबद्दल मी त्यांचा ऋणी आहे. पवार साहेबांचे पुरोगामी विचार व कार्य समाजातील शेवटच्या घटकापर्यंत पोहोचविण्याचे काम करणार आहे. पक्ष बळकटीसाठी, मजबूत करण्यासाठी व पक्षाची ध्येय धोरणे सर्वसामान्यापर्यंत पोहचविण्यासाठी प्रयत्न करणार आहे. तसेच या पदाच्या माध्यमातून जेष्ठ नागरिकांच्या समस्या सोडविण्यासाठी सर्वात प्रथम प्राधान्य देणार आहे.
