Dhurandhar 2 Box Office Collection : डिसेंबर 2025 मध्ये प्रदर्शित झालेल्या ‘धुरंधर’ या स्पाय ॲक्शन थ्रिलरने बॉक्स ऑफिसवर मोठं यश मिळवल्यानंतर त्याचा सिक्वेल ‘धुरंधर: द रिव्हेंज’ आज 19 मार्च रोजी जगभरात प्रदर्शित झाला आहे. दिग्दर्शक आदित्य धर यांच्या या बहुप्रतिक्षित चित्रपटाने रिलीजपूर्वीच कमाईचे विक्रम मोडायला सुरुवात केली आहे.
18 मार्च रोजी झालेल्या पेड प्रिव्ह्यू शोमधूनच चित्रपटाने प्रचंड कमाई केली. उपलब्ध आकडेवारीनुसार, देशभरात सुमारे 12,292 प्रिव्ह्यू शोजमधून तब्बल 52.71 कोटी रुपयांचा गल्ला जमवला गेला. यामध्ये केवळ भारतातील पेड प्रीमियरमधून सुमारे 43 कोटी रुपये मिळाले, तर जागतिक स्तरावर हा आकडा सुमारे 75 कोटी रुपयांपर्यंत पोहोचला.
रिलीजच्या पहिल्याच दिवशी चित्रपटाला जबरदस्त प्रतिसाद मिळताना दिसतोय. संध्याकाळी 6:30 वाजेपर्यंत ‘धुरंधर: द रिव्हेंज’ने भारतात 71.08 कोटी रुपयांची कमाई केली आहे. पेड प्रिव्ह्यूची रक्कम धरून चित्रपटाचं एकूण कलेक्शन 114.08 कोटी रुपयांवर पोहोचलं आहे. रात्रीच्या शोजमुळे हा आकडा आणखी वाढण्याची शक्यता आहे.
चित्रपटाला प्रिव्ह्यूमध्येच सुमारे 46.7 टक्के प्रेक्षक उपस्थिती मिळाली, जी मोठ्या ओपनिंगची स्पष्ट चिन्हं मानली जातात. मिळालेल्या प्रतिसादावरून हा चित्रपट पहिल्याच दिवशी जागतिक स्तरावर 200 कोटींचा टप्पा पार करू शकतो, असा अंदाज वर्तवला जात आहे. भारतातही 100 कोटींच्या पुढे ओपनिंग जाण्याची शक्यता आहे.
‘धुरंधर’च्या पहिल्या भागाने सुमारे 13 अब्ज रुपयांची कमाई करत ब्लॉकबस्टरचा दर्जा मिळवला होता. त्यामुळे सिक्वेलकडूनही मोठ्या अपेक्षा होत्या. सुरुवातीच्या आकडेवारीवरून ‘धुरंधर: द रिव्हेंज’ हा त्या अपेक्षांवर खरा उतरताना दिसत आहे आणि बॉक्स ऑफिसवर आणखी मोठे विक्रम करण्याची चिन्हं स्पष्ट दिसत आहेत.
