बीड : अंबाजोगाई तालुक्यातील परळीवेस परिसरातील अण्णाभाऊ साठे नगरमध्ये एक अत्यंत दुर्दैवी घटना घडली आहे. पतीच्या दारूच्या व्यसनाला आणि सततच्या शारीरिक-मानसिक त्रासाला कंटाळून एका 30 वर्षीय शीतल बापूराव लोंढे या विवाहितेने गळफास घेऊन आत्महत्या केली. याप्रकरणी पती बापूराव भगवान लोंढे याच्या विरोधात परळीच्या संभाजीनगर पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, शीतलचा विवाह 2020 मध्ये बापूरावसोबत झाला होता. हे दोघेही ऊसतोडीचे काम करून आपला संसार चालवत होते. लग्नानंतर काही काळ त्यांचा संसार अगदी सुरळीत चालला होता. परंतु, पतीला दारूचे व्यसन जडल्यामुळे त्यांच्या आयुष्यात वाद सुरू झाले. बापूराव रोज दारू पिऊन घरी यायचा आणि शुल्लक कारणांवरून शीतलशी भांडण करायचा. या रोजच्या कलहामुळे घरात सतत तणावाचे वातावरण राहत होते.
दरम्यान 17 ऑक्टोबर रोजी रात्री साडेआठच्या सुमारास बापूराव नेहमीप्रमाणे दारू पिऊन घरी परतला. आल्याबरोबर त्याने शीतलसोबत पुन्हा वाद घातला. काही वेळाने वाद मिटल्यानंतर दोघेही झोपायला गेले. परंतु, रात्री उशिरा घरातून अचानक रडण्याचा आवाज आल्याने शेजाऱ्यांना व नातेवाइकांना शंका आली. त्यांनी तातडीने घरात जाऊन पाहिले असता, शीतलने गळफास घेतल्याचे निदर्शनास आले. तिला तातडीने उपचारासाठी रुग्णालयात हलवण्यात आले, मात्र उपचारापूर्वीच तिचा मृत्यू झाल्याचे डॉक्टरांनी घोषित केले.
पत्नीच्या मृत्यूनंतर शीतलच्या माहेरच्या लोकांनी पतीच्या सततच्या छळाला व मारहाणीला कंटाळून तिने हे टोकाचे पाऊल उचलल्याचा गंभीर आरोप केला. या प्रकरणी मृताच्या काकांच्या तक्रारीवरून पोलिसांनी पतीविरुद्ध गुन्हा नोंदवला असून, संभाजीनगर पोलीस या प्रकरणाचा अधिक तपास करत आहेत. एका होतकरू तरुण जोडप्याचा असा दुर्दैवी अंत झाल्यामुळे संपूर्ण परिसरात हळहळ व्यक्त केली जात आहे.
