पुणे : पुण्यात स्पर्धा परीक्षांची तयारी करणाऱ्या विद्यार्थ्यांच्या आंदोलनावरून राजकीय वातावरण चांगलेच तापले आहे. आमदार रोहित पवार यांच्या नेतृत्वात एमपीएससीचे परीक्षार्थी विविध मागण्यांसाठी रस्त्यावर उतरले आहेत. परीक्षांमधील गैरप्रकार थांबवणे, पेपरफुटीतील दोषींवर कडक कारवाई करणे, रिक्त पदे वेळेत भरणे आणि पारदर्शक पद्धतीने परीक्षा प्रक्रिया राबवणे या विद्यार्थ्यांच्या प्रमुख मागण्या आहेत.
या आंदोलनावर भाष्य करताना पुण्याच्या महापौर मंजुषा नागपुरे यांनी हे आंदोलन विद्यार्थ्यांचे नसून राजकीय असल्याचा आरोप केला. तसेच, धमक असेल तर आंदोलकांनी पुणे शहर बंद पाडून दाखवावे, असे उघड आव्हानही त्यांनी दिले. महापौरांच्या या वक्तव्यानंतर शिंदेसेनेचे नेते आणि माजी आमदार रवींद्र धंगेकर यांनी त्यांच्यावर जोरदार टीका केली आहे.
धंगेकर म्हणाले की, आंदोलनात सहभागी असणारी मुले ही शेतकरी, कष्टकरी आणि मध्यमवर्गीय कुटुंबातील आहेत. ही तरुण पिढी भविष्यातील प्रशासकीय व्यवस्था आहे. त्यांच्या न्याय्य मागण्यांकडे आव्हानाच्या भूमिकेतून न पाहता लोकप्रतिनिधींनी संवेदनशीलतेने आणि सहानुभूतीने पाहिले पाहिजे. स्पर्धा परीक्षेचे विद्यार्थी हे कोणाचेही राजकीय विरोधक नाहीत, असेही त्यांनी स्पष्ट केले.
पुण्यात लाखो विद्यार्थी अभ्यासासाठी येतात. त्यांच्यामुळे मेस, हॉस्टेल, अभ्यासिका, वाचनालये आणि वाहतूक व्यवस्था यावर आधारित एक मोठी स्थानिक अर्थव्यवस्था चालते. अशा स्थितीत लोकप्रतिनिधींनी विद्यार्थ्यांची भेट घेऊन त्यांच्या समस्या समजून घेणे गरजेचे होते. महापौरांनी आव्हान द्यायचेच असेल तर ते राजकीय पक्षांना द्यावे, विद्यार्थ्यांवर अशी भाषा वापरणे लोकप्रतिनिधींना शोभत नाही, असा सल्ला धंगेकर यांनी दिला.
