मुंबई: कल्याण शहराच्या (Crime News) पश्चिम भागातील सिंधी गेट परिसरात महिला प्रवाशांच्या सुरक्षिततेबद्दल चिंता वाढवणारी एक गंभीर घटना नुकतीच समोर आली आहे. एका रॅपिडो बाईक चालकाने प्रवासादरम्यान एका तरुणीवर जबरदस्ती करण्याचा प्रयत्न केला. या संतापजनक घटनेत, तरुणीने मोठे धैर्य दाखवले. तिने स्वतःचा बचाव करत आरडाओरड केली, ज्यामुळे एक मोठी दुर्घटना टळली. त्यानंतर, परिसरातील लोकांनी त्वरित एकत्र येऊन त्या नराधम चालकाला जागेवरच पकडले. ही गंभीर घटना कल्याण पश्चिमेकडील सिंधी गेट भागात संध्याकाळच्या सुमारास घडली.
पीडित तरुणीने जिम जाण्यासाठी रॅपिडो बाईकची सेवा घेतली होती. पण, बाईक चालकाने तिला जिमकडे न नेता, एका निर्जन व अंधाऱ्या ठिकाणी नेले. तिथे त्याने तरुणीसोबत गैरवर्तन करत तिच्यावर बळजबरी करण्याचा प्रयत्न सुरू केला.
या घटनेचा व्हिडीओही सध्या सोशल मीडियावर खूप व्हायरल होत आहे. आरोपीजवळ चाकू आणि ॲसिडसारखे घातक पदार्थ असल्याची शक्यता तरुणीने व्यक्त केली आहे.
घटनेची माहिती मिळताच पोलिसांनी तात्काळ घटनास्थळी धाव घेतली आणि परिस्थिती नियंत्रणात आणली. दरम्यान, आरोपीविरुद्ध गुन्हा दाखल करण्यात आला असून पुढील तपास सुरु आहे.
