पिंपरी, (पुणे) : पुण्यात येवले चहाच्या दुकानात फ्रिजच्या विजेच्या धक्क्याने १७ वर्षीय बालकामगाराचा मृत्यू झाल्याची घटना घडली आहे. या घटनेने परिसरात हळहळ व्यक्त केली जात आहे. या प्रकरणी दुकान मालकावर गुन्हा दाखल करण्यात आला आहे. तळवडे परिसरातील टाॅवर लाइन येथील येवले चहाच्या दुकानात सोमवारी ११ मार्चला दुपारी दीड वाजण्याच्या सुमारास ही घटना घडली.
गणेश जगताप असं गुन्हा दाखल झालेल्या दुकान मालकाचे नाव आहे. प्रेमकुमार सिद्धाराम बनसोडे (४३, रा. मिलिंदनगर, ओटास्किम, निगडी) यांनी याप्रकरणी चिखली पोलिस ठाण्यात फिर्याद दिली आहे.
पोलिसांनी दिलेल्या अधिक माहितीनुसार, फिर्यादी प्रेमकुमार यांच्या मुलाचे वय १७ आहे हे माहिती असूनही गणेश जगताप याने त्याला कामावर ठेवले. तसेच दुकानातील फ्रिजच्या बॉडीमध्ये करंट (वीज प्रवाह) उतरत असल्याचे गणेश याला माहिती असताना देखील याकडे त्यांनी दुर्लक्ष करून कामगारांच्या सुरक्षिततेबाबत कोणतीही उपाययोजना केली नाही. तसेच फ्रिजमुळे विजेचा धक्का बसण्याची शक्यता असल्याचे कामगारांनी सांगितले. तरीही गणेश जगताप याने फ्रिजची दुरुस्ती केली नाही.
दुकान मालक गणेश जगताप याने फिर्यादी प्रेमकुमार यांच्या १७ वर्षीय मुलाला फ्रिजवर चढून चहाचे कप काढण्यास सांगितले. यामुळे मुलाला विजेचा धक्का बसला. या घटनेत मुलाचा मृत्यू झाला. याप्रकरणी गणेश जगताप याच्यावर बालकामगार सुधारीत अधिनियम अतंर्गत गुन्हा दाखल करण्यात आला आहे. सहायक पोलिस निरीक्षक गणेश खारगे तपास करीत आहेत.
