BMC Election : नगर परिषद निवडणुका पार पडल्यानंतर आता संपूर्ण महाराष्ट्राचे लक्ष बहुप्रतिक्षित महापालिका (Municipal Corporation) आणि जिल्हा परिषद निवडणुकांकडे लागले आहे. गेल्या सात-आठ वर्षांपासून रखडलेल्या मुंबई (Mumbai), ठाण्यासह राज्यातील २९ महापालिका निवडणुकांचे काउंटडाऊन सुरू झाले असून, आता या निवडणुकांच्या तारखांबाबत मोठी अपडेट समोर आली आहे.
राज्याचे हिवाळी अधिवेशन १४ डिसेंबर रोजी संपणार आहे. सूत्रांकडून मिळालेल्या विश्वसनीय माहितीनुसार, अधिवेशन संपल्यानंतर १५ डिसेंबरनंतर कधीही महापालिका निवडणुकांचा बिगुल वाजण्याची शक्यता आहे. निवडणुकीच्या घोषणेसोबतच संपूर्ण राज्यात आचारसंहिता लागू होईल आणि निवडणूक प्रक्रियेला वेग येईल. विशेष म्हणजे, आगामी १५ डिसेंबर रोजी राज्यातील १०० हून अधिक मोठ्या प्रकल्पांचे भूमिपूजन आणि उद्घाटन होणार आहे. त्यानंतर लगेचच आचारसंहिता लागू होण्याची शक्यता अधिक बळकट झाली आहे.
महापालिका निवडणुका दोन टप्प्यांत पार पडणार असल्याचे जवळपास निश्चित झाले आहे. सर्वोच्च न्यायालयाने (Supreme Court) स्थानिक स्वराज्य संस्थांच्या निवडणुका ३१ जानेवारी २०२६ पर्यंत पार पाडण्याचे निर्देश दिले आहेत आणि याबाबत कठोर भूमिका घेतली आहे. त्यामुळे यंदाची संपूर्ण निवडणूक प्रक्रिया केवळ ३० दिवसांत पूर्ण केली जाणार आहे. २०१७ मध्ये घोषणा आणि मतदानात दोन महिन्यांचे अंतर होते, परंतु यावेळी प्रक्रिया वेगाने पूर्ण होईल. निवडणूक आयोग १४ किंवा १५ जानेवारी २०२६ रोजी मतदान घेण्याच्या तयारीत असल्याची जोरदार चर्चा आहे. सोमवारी किंवा शुक्रवारी मतदान असल्यास नागरिक सुट्ट्या जोडून बाहेर पडतात आणि मतदानाची टक्केवारी घसरते, हा अनुभव टाळण्यासाठी हे दिवस निवडले जाण्याची शक्यता आहे.
राज्यात सगळ्यात महत्त्वाची निवडणूक ही मुंबई महापालिकेची (BMC Election) होणार आहे. शिवसेनेतील फुटीनंतर उद्धव ठाकरे यांच्यासाठी मुंबई महापालिकेचे मैदान राखण्याचे मोठे आव्हान आहे. मुंबईत उद्धव ठाकरे आणि राज ठाकरे एकत्र येऊन ‘ठाकरे बंधू विरुद्ध महायुती’ अशी थेट लढत होण्याची शक्यता वर्तवली जात आहे. मुंबई महापालिकेची निवडणूक जानेवारी महिन्यातील दुसऱ्या आठवड्यात पार पडण्याची शक्यता आहे. नागपूर आणि चंद्रपूर वगळता उर्वरित २७ महानगरपालिकांच्या निवडणुकांचा मार्ग आधीच मोकळा झाला असल्याचे संकेत निवडणूक आयोगाने दिले आहेत, त्यामुळे पुढील आठवड्यात आयोगाच्या निर्णयाकडे सर्वांचे लक्ष लागले आहे.
