Baramati : गेल्याच आठवड्यात सोलापूरच्या बार्शीमध्ये दर्शनाला निघालेल्या कुटुंबावर काळाने घाला घातला होता. तुळजाभवानीच्या दर्शनासाठी जात असताना कार आणि ट्रकचा झालेला अपघात, आणि त्यात गेलेले पाच जीव ही घटना अजूनही ताजी असतानाच आता पुन्हा एक भीषण अपघाताची बातमी समोर आली आहे.
बारामती शहरातील शिवाजी नगरमधील जगताप दाम्पत्य तिरुपती बालाजीच्या दर्शनासाठी गेले होते. दर्शन करून परतत असताना आज पहाटे साडेचारच्या सुमारास हुबळी राष्ट्रीय महामार्गावर पुढे जाणाऱ्या ट्रकने अचानक ब्रेक दाबला, आणि त्यांच्या गाडीची त्या ट्रकला जोरदार धडक बसली. या धडकेत अनिल जगताप जागीच ठार झाले, तर पत्नी वैशाली गंभीर जखमी झाल्या. त्यांना तातडीने हुबळीच्या शासकीय रुग्णालयात दाखल करण्यात आलं, पण उपचारादरम्यान त्यांचाही मृत्यू झाला. (Baramati)
या अपघातात एक मुलगी जखमी झाली असून तिच्यावरही रुग्णालयात उपचार सुरू आहेत. गाडीत एकूण पाच जण होते. त्यापैकी दोन ठार, एक जखमी तर उर्वरित दोघे सुखरूप बचावले. पण घरातील कर्ता पुरुष आणि सून एकदम गेल्याने जगताप कुटुंबावर दुःखाचा डोंगर कोसळला असून परिसरातही शोककळा पसरली आहे.
अलीकडे महामार्गावरील अपघातांची मालिका वाढतच चालली आहे. जास्त वेग, ओव्हरटेकची घाई, आणि काही ठिकाणी ड्रिंक अँड ड्राईव्ह या गोष्टी जीवघेण्या ठरत आहेत. वारंवार होणाऱ्या या दुर्घटना पाहता रस्त्यावरील सुरक्षिततेचा प्रश्न पुन्हा गंभीरपणे पुढे आला आहे.
