Ashok Kharat : नाशिकमधील अशोक खरात महिला अत्याचार प्रकरणाला आता स्पष्टपणे राजकीय रंग चढू लागला आहे. शिवसेना (उद्धव बाळासाहेब ठाकरे) पक्षाच्या उपनेत्या सुषमा अंधारे यांनी राष्ट्रवादी काँग्रेसच्या नेत्या आणि राज्य महिला आयोगाच्या अध्यक्षा रुपाली चाकणकर यांच्यावर गंभीर आरोप करत खळबळ उडवून दिली आहे.
पत्रकार परिषदेत अंधारे यांनी दावा केला की, चाकणकर आणि आरोपी अशोक खरात यांच्यात केवळ ओळख नव्हे तर आर्थिक हितसंबंधही आहेत. या संबंधांचे पुरावे आपण पुढील 2 दिवसांत जाहीर करणार असल्याचा इशाराही त्यांनी दिला. याशिवाय, खरातविरोधात बातमी प्रसिद्ध करणाऱ्या एका वृत्तपत्राच्या पत्रकारावर गुन्हे दाखल करण्यासाठी चाकणकर यांनी दबाव आणल्याचा आरोपही त्यांनी केला.
या प्रकरणातील सर्वात वादग्रस्त मुद्दा म्हणजे तंत्र-मंत्र आणि काळ्या जादूचा. एका पीडित महिलेच्या हवाल्याने अंधारे यांनी दावा केला की, रुपाली चाकणकर स्वतः तंत्र-मंत्र साधना करत होत्या. एवढंच नव्हे, तर त्यांनी या विधीसाठी आपल्या हाताची अनामिका कापल्याचाही आरोप करण्यात आला. सप्टेंबर 2024 मधील काही छायाचित्रांमध्ये त्यांच्या बोटाला बँडेज दिसत असल्याचा उल्लेख करत, हा प्रकार सोमवती अमावस्येच्या काळात झाल्याचा दावा अंधारे यांनी केला.
या सर्व आरोपांमुळे दोन मोठे प्रश्न निर्माण झाले आहेत. पहिला म्हणजे महिला अत्याचारासारख्या गंभीर प्रकरणात संबंधित संस्थेच्या प्रमुखांवरच संशय निर्माण होणं. आणि दुसरा म्हणजे अंधश्रद्धा निर्मूलन कायद्याच्या पार्श्वभूमीवर ‘तंत्र-मंत्र’सारख्या दाव्यांचा उगम.
दरम्यान, रुपाली चाकणकर यांनी यापूर्वी खरातशी कोणताही वैयक्तिक संबंध नसल्याचं स्पष्ट केलं आहे. मात्र, अंधारे यांनी मांडलेल्या दाव्यांमुळे आता चाकणकर यांची भूमिका आणि स्पष्टीकरण महत्त्वाचं ठरणार आहे.
संपूर्ण प्रकरणात सत्य काय आहे, हे तपासातूनच स्पष्ट होईल. पण या आरोप-प्रत्यारोपांमुळे मूळ मुद्दा महिलांवरील अत्याचार याकडून लक्ष विचलित होण्याची भीती व्यक्त केली जात आहे.
