Ashok Kharat : नाशिकमध्ये तथाकथित ‘दैवी शक्ती’ आणि तंत्र-मंत्राच्या आड महिलांवर लैंगिक अत्याचार व आर्थिक फसवणूक करणाऱ्या अशोककुमार खरात उर्फ ‘कॅप्टन’ प्रकरणाने गंभीर वळण घेतले आहे. आरोपीला आज, रविवार (दि. 29) न्यायालयात हजर करण्यात येणार असून, तपासाची व्याप्ती दिवसेंदिवस वाढताना दिसत आहे.
‘एसआयटी’कडून सलग 3 दिवस आरोपीच्या कार्यालय आणि फार्महाऊसची सखोल झडती घेण्यात आली. या कारवाईत पिस्तूल, 21 जिवंत काडतुसे आणि वापरलेल्या 5 काडतुसांच्या पुंगळ्या जप्त करण्यात आल्या आहेत. या शस्त्रांचा वापर नेमका कशासाठी झाला, याबाबत फॉरेन्सिक अहवाल निर्णायक ठरणार आहे. तपास यंत्रणांच्या मते, आरोपीने भीतीचे वातावरण निर्माण करण्यासाठी किंवा गंभीर गुन्ह्यांसाठी शस्त्रांचा वापर केला असण्याची शक्यता नाकारता येत नाही.
आतापर्यंत खरातविरुद्ध अत्याचाराचे 8 आणि फसवणुकीचे 2 असे एकूण 10 गुन्हे नोंद झाले आहेत. मात्र, धक्कादायक बाब म्हणजे जवळपास 150 पीडितांनी प्रत्यक्ष समोर येण्याऐवजी ‘कॉल’द्वारे तक्रारी नोंदवल्या आहेत. यावरून आरोपीने निर्माण केलेल्या मानसिक दहशतीची तीव्रता स्पष्ट होते.
ताज्या प्रकरणात, एका महिलेला ऑगस्ट ते डिसेंबर 2024 दरम्यान 4 वेळा गुंगीसदृश पदार्थ देऊन अत्याचार केल्याचा आरोप आहे. ‘मी महादेवाचा अवतार आहे’ अशी भीती दाखवत तिच्या इच्छेविरुद्ध संबंध ठेवले, असे फिर्यादीत नमूद आहे.
याचबरोबर, नेवासा येथील कापड व्यावसायिकाचीही फसवणूक उघड झाली आहे. डिसेंबर 2022 ते 19 मार्च 2026 दरम्यान ‘मंत्रांनी भारलेले’ दागिने देण्याचे आमिष दाखवून आरोपीने 20 ग्रॅम सोन्याच्या 3 अंगठ्या आणि सुमारे 2.62 लाख रुपये उकळले. तपासात त्या अंगठ्या बनावट असल्याचे निष्पन्न झाले.
