Ancestral Land Shares just 200 Rupees : आता वडिलोपार्जित जमिनीच्या पोटहिश्शांची मोजणी करायला शेतकऱ्यांना मोठा खर्च करावा लागणार नाही. कारण राज्य सरकारने शेतकऱ्यांना मोठा दिलासा दिलाय. आधी काय होतं? पोटहिस्सा मोजणी करायला हजार रुपयांपासून थेट 14 हजारांपर्यंत खर्च यायचा. त्यामुळे शेतकऱ्यांचा खिसा अक्षरशः रिकामा व्हायचा. पण आता राज्य सरकारने मोठा निर्णय घेतला आहे. प्रति पोटहिस्सा फक्त 200 रुपये देऊन मोजणी करून घेता येणार आहे. (Ancestral Land Shares just 200 Rupees )
हा नवीन निर्णय राज्यभर लागू झाला असून संबंधित सर्व जिल्ह्यांच्या भूमी अभिलेख विभागाला याची माहिती देण्यात आली आहे. आता कुणी पोटहिस्सा मोजणीसाठी अर्ज केला, तर त्याला केवळ 200 रुपये भरावे लागतील. महाभूअभिलेखच्या वेबसाइटवरही हे नवीन दर अपडेट झाले आहेत. त्यात ‘एकत्र कुटुंब पोटहिस्सा मोजणी’ हा नवीन पर्यायही जोडला आहे.
ई-मोजणी व्हर्जन 2.0 या संगणक प्रणालीमध्येही बदल करण्यात आले असून, संपूर्ण प्रक्रिया आता आधीपेक्षा पारदर्शक आणि सोपी होणार आहे. कुटुंबात जमिनीच्या वाटणीवरून कायम वाद होतातच, शिवाय मोजणीच्या खर्चामुळे आणखी त्रास वाढायचा. पण या निर्णयामुळे कुटुंबातील सदस्यांवर आर्थिक बोजा पडणार नाही.
जमाबंद आयुक्त आणि भूमी अभिलेख विभागाच्या संचालकांनी यासंदर्भात अधिकृत पत्र जारी केले आहे. यापूर्वी मोजणी दोन प्रकारे होत होती-साधी आणि जलद. जलद मोजणीसाठी तर जास्तच शुल्क लागत होतं. पण आता हा संपूर्ण खर्च मोठ्या प्रमाणात कमी करण्यात आला असून शेतकऱ्यांना याचा थेट फायदा होणार आहे.
