नागपूर: राष्ट्रवादी काँग्रेसचे (अजित पवार गट) आमदार अमोल मिटकरी (Amol Mitkari)यांनी महाराष्ट्राच्या राजकारणासंदर्भात एक महत्त्वपूर्ण आणि सूचक विधान केले आहे. माजी मुख्यमंत्री पृथ्वीराज चव्हाण (Prithviraj Chavan) यांनी केलेल्या ‘देशाच्या पंतप्रधानपदी मराठी माणूस बसू शकतो’ या विधानाचा संदर्भ देत, मिटकरी यांनी महाराष्ट्रात लवकरच ‘अजितपर्व’ येईल, असे म्हटले आहे. (Amol Mitkari On Ajit Pawar)
ते म्हणाले, “पृथ्वीराज चव्हाण यांचे वक्तव्य सहजपणे केलेले नव्हते. ते गांभीर्याने घेण्याची गरज आहे. महायुती सरकारच्या दुसऱ्या वर्षपूर्तीनिमित्त महाराष्ट्रात काहीतरी वेगळे होऊ शकते का, हे पृथ्वीराज चव्हाण यांना विचारले पाहिजे. त्याच अनुषंगाने मी महाराष्ट्रात लवकरच अजितपर्व येईल, असे वक्तव्य केले आहे.”
अजित पवार यांचे कौतुक
मिटकरी यांनी यावेळी उपमुख्यमंत्री अजित पवार (Ajit Pawar) यांच्या कामाचे जोरदार कौतुक केले. ते म्हणाले, “गेल्या वर्षभरापासून महायुती सरकारमध्ये अजित पवार हे उर्जावान मंत्री म्हणून काम करत आहेत. ते काम करणारं नेतृत्व आहे. त्यांचे कधी रुसवेफुगवे नसतात किंवा ते सरकारवर कधी नाराजही होत नाहीत.”
लाडक्या बहिणींची संकल्पना दादांची
‘लाडकी बहीण योजना’ ही संकल्पना दादांची होती आणि त्याची अंमलबजावणीही त्यांनीच केली. विधानसभा निवडणुकीत महायुतीला लाडक्या बहिणींचा भक्कम आधार मिळाला, असे मिटकरी म्हणाले.
इतक्या मोठ्याप्रमाणावर विरोधक त्यांच्यावर आरोप करतात, अशावेळी जवळचे-बाहेरचे शांत बसून सगळं ऐकतात, तरीही अजिबात विचलित न होता अजित पवार काम करतात. त्यांनी कधी उद्वेग व्यक्त केला नाही किंवा रुसून ते कधी बारामतीला गेले नाहीत. दादा या काळात शांततेने आपले काम करत राहिले.”
पार्थ पवार प्रकरण
अमोल मिटकरी यांनी यावेळी महायुतीतील आपली भूमिका स्पष्ट केली. “पार्थ पवार प्रकरणात दादांचा फोन नॉट रिचेबल झाला नाही. त्यांनी संयम ठेवला. गेल्या वर्षभराच्या काळात आम्ही महायुतीत घट्टपणे काम केले आणि देवेंद्र फडणवीस यांच्या चौखूर धावणाऱ्या रथाला पाठिंबा दिला.”
ते पुढे म्हणाले, “आम्ही देवेंद्र फडणवीस साहेबांचं नेतृत्त्व स्वीकारले आहे. आम्ही राज्यात दुसऱ्या क्रमांकाचे उपमुख्यमंत्री आहोत, हेदेखील मान्य करतो. पहिले उपमुख्यमंत्री एकनाथ शिंदे आहेत. त्यामुळे कार्तिकी एकादशीला आम्ही विठ्ठलाच्या पूजेचा मान त्यांना दिला.”
अमोल मिटकरी यांच्या या विधानामुळे महाराष्ट्राच्या राजकारणात नवीन चर्चा सुरु झाल्या आहेत.
हेही वाचा: गुंडगिरीचा कहर..! खेड घाटात चालती एसटी आडवी थांबवून चालकाला मारहाण, प्रवाशांमध्ये भीतीचे वातावरण
