आयुष कोमकर हत्या प्रकरणातील आरोपी बंडू आंदेकरला महापालिका निवडणूक लढवण्याची परवानगी; मकोका न्यायालयाचा निर्णय 

पुणे: आयुष कोमकर हत्या प्रकरणात आरोपी असलेल्या सूर्यकांत उर्फ बंडू आंदेकर याला पुणे महापालिका निवडणूक लढवण्यासाठी विशेष मकोका न्यायालयाने परवानगी दिली आहे. बंडू आंदेकरसह आंदेकर टोळीवरील 15 जणांवर महाराष्ट्र संघटित गुन्हेगारी नियंत्रण कायद्यांतर्गत कारवाई सुरू असून सर्व आरोपी सध्या न्यायालयीन कोठडीत आहेत.

 हत्यांची मालिका आणि आंदेकर टोळीवर कारवाई

माजी नगरसेवक वनराज आंदेकर यांच्या निर्घृण हत्येनंतर शहरात आधीच तणावाचे वातावरण होते.  1  सप्टेंबर 2024 रोजी नाना पेठेतील डोके तालिमजवळ सहा दुचाक्यांवर आलेल्या  10-12 हल्लेखोरांनी वनराज आंदेकर याच्यावर गोळीबार व कोयत्याने हल्ला केला. विजेचा पुरवठा खंडित करून केलेल्या या हल्ल्यात वनराजचा जागीच मृत्यू झाला. घरगुती वादातून ही हत्या झाल्याची माहिती पुढे आली होती.

याच घटनांच्या पार्श्वभूमीवर, गणेश विसर्जनाच्या पूर्वसंध्येला वनराज आंदेकर याच्यावर हल्ला करणारा आरोपी गणेश कोमकर याचा मुलगा आयुष कोमकर याची नाना पेठेत हत्या झाली. आयुष हा बंडू आंदेकरचा नातू असून या हत्येप्रकरणात बंडू आंदेकर, कृष्णा आंदेकर, माजी नगरसेविका लक्ष्मी आंदेकर, सोनाली आंदेकर यांच्यासह 15 जणांना अटक करण्यात आली.

आयुष कोमकर याच्या आईच्या फिर्यादीनुसार आंदेकर टोळीतील एकूण  13 जणांवर स्वतंत्र गुन्हे दाखल करण्यात आले आहेत. दोन्ही घटनांनंतर आंदेकर गटावर मकोका अंतर्गत कारवाई करण्यात आली आहे.

 निवडणूक लढण्यावर न्यायालयाचा महत्वपूर्ण निर्णय

बंडू आंदेकर, भावजय लक्ष्मी आंदेकर आणि सून सोनाली आंदेकर यांनी त्यांच्या वकिलामार्फत आगामी पुणे महापालिका निवडणूक लढवण्यासाठी न्यायालयात अर्ज दाखल केला होता. विशेष न्यायाधीश एस.आर. साळुंके यांनी हा अर्ज मंजूर करत,  “आरोपींना नियमानुसार निवडणूक लढवण्याचा अधिकार आहे,” असा निर्णय दिला आहे.   वकील मिथुन चव्हाण यांनी युक्तिवादात म्हटले,  “लोकप्रतिनिधी हक्क कायद्यानुसार निवडणूक अर्ज भरण्याचा हक्क आरोपींनाही आहे,” असे सांगितले. यावर न्यायालयाने महत्वपूर्ण निर्णय दिला आहे.

न्यायालयाने स्पष्ट केले की, “निवडणूक लढवणे हा प्रत्येक नागरिकाचा घटनात्मक अधिकार असून त्यासाठी स्वतंत्र परवानगीची आवश्यकता नाही.” असे न्यायालयाने म्हटले आहे.

निवडणूक लढवण्याची परवानगी मिळाल्याने, गुन्हेगारी पार्श्वभूमी आणि सततच्या हत्याकांडांमुळे चर्चेत असलेल्या आंदेकर कुटुंबाची पुन्हा एकदा पुण्याच्या राजकारणात एंट्री होणार असल्याचे संकेत मिळत आहेत.