Accident News : पांढरकवडा: पांढरकवडा-घाटंजी मार्गावर साखरा गावाजवळ 14 एप्रिल रोजी रात्री सुमारे 8 वाजण्याच्या सुमारास भीषण अपघात घडला. या अपघातात बाप आणि लहान मुलीचा जागीच मृत्यू झाला असून पत्नी गंभीर जखमी झाली आहे. या घटनेमुळे परिसरात हळहळ व्यक्त केली जात आहे. मिळालेल्या माहितीनुसार, साईकिरण गुरगुल्ला (वय 32) हे आपल्या कुटुंबासह जयंतीच्या कार्यक्रमासाठी साखरा येथे आले होते. कार्यक्रम आटोपल्यानंतर ते पत्नी आणि 6 महिन्यांच्या मुलीसह कारने आदिलाबादकडे परतत होते.
दरम्यान, साखरा गावाजवळ समोरून येणाऱ्या भरधाव ट्रकने त्यांच्या कारला जोरदार धडक दिली. ही धडक इतकी भीषण होती की कारचा पूर्णपणे चक्काचूर झाला. अपघातानंतर घटनास्थळी भीषण दृश्य निर्माण झाले होते. या अपघातात साईकिरण गुरगुल्ला आणि त्यांची लहान मुलगी हंसिका यांचा जागीच मृत्यू झाला. तर पत्नी अनुष्का गुरगुल्ला या गंभीर जखमी झाल्या आहेत. त्यांना तातडीने रुग्णालयात दाखल करण्यात आले असून त्यांच्यावर उपचार सुरू आहेत.
अपघाताचा आवाज ऐकताच स्थानिक नागरिक आणि काही समाजसेवकांनी घटनास्थळी धाव घेतली. त्यांनी जखमींना कारमधून बाहेर काढून तातडीने रुग्णवाहिकेची व्यवस्था केली. या घटनेमुळे परिसरात मोठी खळबळ उडाली असून एका क्षणात कुटुंब उद्ध्वस्त झाल्याची भावना व्यक्त केली जात आहे.
दरम्यान, या अपघाताची माहिती मिळताच पोलिसांनी घटनास्थळी पोहोचून पंचनामा केला असून पुढील तपास सुरू आहे. भरधाव वाहन चालवण्यामुळे अशा घटना वाढत असल्याने वाहन चालकांनी अधिक काळजी घेण्याचे आवाहन करण्यात येत आहे.
