पुणे : कौटुंबिक वादातून एका व्यक्तीने घरातच स्फोट घडवून आणल्याची धक्कादायक घटना कर्नाटकातील कलबुरगी जिल्ह्यात घडली. या घटनेत संबंधित व्यक्तीसह त्याच्या १५ वर्षीय मुलीचा मृत्यू झाला असून पत्नी, मुलगा आणि नातेवाईकांसह सहा जण गंभीर जखमी झाले आहेत. मंगळवारी सकाळी ही घटना घडली.
शिवलाल बळीराम राठोड (वय ४९) असे मृत व्यक्तीचे नाव आहे. तो पुण्यातील एका दगड खाणीत काम करत होता. त्याचे पत्नी सवितासोबत कौटुंबिक कारणावरून वाद सुरू होते. या वादामुळे सविता आपल्या १५ वर्षीय मुलगी वीरा आणि १९ वर्षीय मुलगा प्रकाश यांना घेऊन नातेवाईकांकडे गेली होती.
पत्नी आणि मुले घर सोडून गेल्याचा राग मनात धरून शिवलाल मंगळवारी सकाळी नातेवाईकांच्या घरी पोहोचला. तो पुण्याहून कथितरित्या स्फोटके घेऊन आल्याची माहिती समोर आली आहे. नातेवाईकांच्या घरात पुन्हा वाद झाल्यानंतर त्याने घराचा दरवाजा आतून बंद केला. त्यानंतर त्याने स्वतःजवळील स्फोटकांचा स्फोट घडवून आणल्याचे सांगण्यात येत आहे.
स्फोटाची तीव्रता इतकी मोठी होती की घराच्या भिंती कोसळल्या. या दुर्घटनेत शिवलाल आणि त्याची मुलगी वीरा यांचा जागीच मृत्यू झाला. तर सविता (४०), प्रकाश (१९), सुरेखा चव्हाण (३०), विवेक चव्हाण (१२) आणि नितेश यांच्यासह अन्य व्यक्ती जखमी झाल्या. स्फोटामुळे उडालेल्या दगडांमुळे शेजारील दोन नागरिकांनाही किरकोळ दुखापत झाली.
घटनेची माहिती मिळताच पोलिसांनी घटनास्थळी धाव घेत पाहणी केली. सर्व जखमींवर कलबुरगी जिल्हा रुग्णालयात उपचार सुरू आहेत. शिवलालला स्फोटके कुठून मिळाली, ती पुण्यातील खाणीतून बाहेर कशी नेण्यात आली आणि या घटनेमागे नेमके काय कारण होते, याचा तपास पोलीस करत आहेत.
