नाशिक : नाशिकच्या दिंडोरी तालुक्यातील वनारवाडी शिवारात एक अतिशय दुर्दैवी घटना घडली आहे. शेतात गवत कापण्यासाठी गेलेल्या युवतीवर बिबट्याने हल्ला केल्याने तरुणीचा जागीच मृत्यू झाला आहे.मुलीचा आरडाओरडा ऐकून वडीलांनी तिला वाचवण्यासाठी धाव घेतली, परंतु बिबट्याने मुलीचे लचके तोडत तिला ठार केले. डोळ्या देखतच मुलीचा अंत झाल्याच्या या घटनेने हळहळ व्यक्त होत आहे.

याबाबत अधिक माहिती अशी की, पायल राजेंद्र चव्हाण ( 20 वर्ष) असे बिबट्याच्या हल्ल्यात मृत्यु झालेल्या मुलीचे नाव आहे. वनारवाडी गावाजवळ राजेंद्र चव्हाण कुटुंबासहीत आपल्या शेतात काम करत होते. पायल ऊसाच्या शेतालगत असलेले गवत कापत होती. त्याचवेळी शेतात आधीपासूनच दबा धरुन बसलेल्या बिबट्याने मागून येऊन पायलवर झडप घातली. बिबट्याने शिवारातच तिला ओढत नेत असताना मुलीच्या किंकाळ्या ऐकू आल्याने तिच्या वडिलांनी आणि आजुबाजूच्या शेतकऱ्यांनी घटनास्थळी धाव घेतली. हल्ल्यात रक्ताने माखलेल्या पायलला तातडीने रुग्णालयात नेण्यात आले. परंतु खासगी रुग्णालयात उपचार करण्यास मिळाल्याने नातेवाईकांनी तिला दिंडोरीच्या ग्रामीण रुग्णालयात दाखल केले. परंतु तेथे डॉक्टरांनी तिला मृत घोषित केले. या घटनेने सर्वत्र हळहळ व्यक्त केली जात आहे.
दरम्यान पायल चव्हाण नाशिकच्या मविप्र महाविद्यालयात शिक्षण घेत होती. या घटनेमुळे चव्हाण कुटुंबावर दुखाचा डोंगर कोसळला आहे. या घटनेनंतर गावकऱ्यांनी हळहळ व्यक्त करत वनविभागावर संताप व्यक्त केला आहे. वनविभागाने पिंजरे लावत बिबट्याचा बंदोबस्त करावा, अशी मागणी नागरिकांनी केली आहे.








