बारामती : बारामती तालुका पोलिस ठाण्याच्या हद्दीतील रुई परिसरात एका 14 वर्षीय मुलीचा इमारतीवरून पडून मृत्यू झाल्याची दुर्दैवी घटना रविवारी (ता. 23) उघडकीस आली. या घटनेने परिसरात हळहळ व्यक्त होत आहे. अवनी अजित दशावतारे (वय 14) असे मृत मुलीचे नाव असून, ती आमदार रोहित पवार यांचे स्वीय सहाय्यक अजित दशावतारे यांची कन्या असल्याची माहिती आहे.
पोलिसांच्या माहितीनुसार, शनिवारी (ता.23) रात्री सुमारे दहा वाजण्याच्या सुमारास कुटुंबीयांनी मुलीला रागावल्याने ती घरातून निघून गेली होती. बराच वेळ शोध घेऊनही ती सापडली नाही. त्यानंतर रविवारी पहाटे कुटुंबीयांनी बारामती तालुका पोलिस ठाण्यात धाव घेतली. पोलिसांनी तिच्या शोधासाठी तातडीने पथके रवाना केली.
शोधमोहीम सुरू असतानाच रुई येथील स्वामी समर्थ रेसिडेन्सीच्या इमारतीजवळ एक मुलगी मृतावस्थेत आढळल्याची माहिती पोलिसांना मिळाली. नातेवाईकांच्या मदतीने ओळख पटविल्यानंतर ती बेपत्ता असलेली अवनीच असल्याचे स्पष्ट झाले.
या घटनेची माहिती मिळताच पोलिस अधिकाऱ्यांनी घटनास्थळी धाव घेतली. फॉरेन्सिक टीम तसेच गुन्हे शोध पथकांनी घटनास्थळाची पाहणी केली. इमारतीच्या टेरेसचा दरवाजा बाहेरून बंद असल्याचे आढळले. शिडीच्या सहाय्याने टेरेसवर गेल्यानंतर तेथे मुलीची चप्पल आढळली. तसेच सीसीटीव्ही फुटेजमध्ये ती रात्री सुमारे दहा वाजता लिफ्टने वर जाताना दिसून आली.
प्राथमिक तपासात उपलब्ध परिस्थितीजन्य पुराव्यांवरून मुलीने इमारतीवरून उडी मारल्याचा पोलिसांचा प्राथमिक अंदाज आहे. मात्र, मृत्यूचे नेमके कारण शवविच्छेदन अहवालानंतर स्पष्ट होणार आहे. मृतदेह बारामती येथील वैद्यकीय महाविद्यालयात शवविच्छेदनासाठी पाठविण्यात आला आहे.
दरम्यान, आमदार रोहित पवार यांनी वैद्यकीय महाविद्यालयात जाऊन घटनेची माहिती घेतली तसेच दशावतारे कुटुंबीयांची भेट घेऊन सांत्वन केले. पुढील तपास महिला पोलिस उपनिरीक्षक धनश्री भगत करीत आहेत.
