बँकेत नोकरी करण्याची इच्छा असणाऱ्या उमेदवारांसाठी एक सुवर्णसंधी उपलब्ध झाली आहे. विविध क्षेत्रांमध्ये नोकऱ्यांमध्ये मंदी असतानाही स्टेट बँक ऑफ इंडिया (SBI) ने सर्कल बेस्ड ऑफिसर्स (CBO) पदांसाठी मोठी भरती जाहीर केली आहे. ही भरती जाहिरात क्रमांक CRPD/CBO/2025-26/03 अंतर्गत करण्यात आली असून, एकूण 2,964 पदे उपलब्ध आहेत. यामध्ये 2,600 नियमित आणि 364 बॅकलॉग पदांचा समावेश आहे. SBI ने अलीकडेच एक शुद्धीपत्रक प्रसिद्ध करून अरुणाचल प्रदेश आणि नागालँडमधील उमेदवारांसाठी अर्ज प्रक्रिया पुन्हा सुरू केली आहे. ज्या उमेदवारांनी दहावी किंवा बारावीत इंग्रजी विषय घेतला होता आणि उत्तीर्ण झाले आहेत, त्यांना आता ईशान्य सर्कल अंतर्गत अर्ज करता येणार आहे.

या भरतीसाठी अर्ज प्रक्रिया 21 जून 2025 पासून सुरू झाली असून, अर्ज करण्याची अंतिम तारीख 30 जून 2025 आहे. अर्ज करण्यासाठी उमेदवार पदवीधर असावा आणि त्याला कोणत्याही अनुसूचित बँक किंवा प्रादेशिक ग्रामीण बँकेत अधिकारी पदावर किमान दोन वर्षांचा अनुभव असणे आवश्यक आहे. अर्ज करणाऱ्याचे वय 30 एप्रिल 2025 रोजी 21 ते 30 वर्षांच्या दरम्यान असावे. अनुसूचित जाती-जमातीसाठी वयोमर्यादेत 5 वर्षे, ओबीसीसाठी 3 वर्षे आणि दिव्यांग उमेदवारांसाठी 10 ते 15 वर्षांची सूट लागू आहे.
या भरती प्रक्रियेमध्ये ऑनलाइन परीक्षा, स्क्रीनिंग, मुलाखत आणि स्थानिक भाषा प्रावीण्य चाचणी अशा टप्प्यांचा समावेश आहे. अंतिम निवड 75 टक्के गुण ऑनलाइन परीक्षेवर आणि 25 टक्के गुण मुलाखतीवर आधारित असेल. ऑनलाइन परीक्षेमध्ये इंग्रजी भाषा, बँकिंग ज्ञान, सामान्य जागरूकता आणि संगणक कौशल्य अशा विषयांवर एकूण 120 वस्तुनिष्ठ प्रश्न विचारले जातील आणि यासाठी 2 तासांचा कालावधी दिला जाईल. यानंतर 30 मिनिटांची वर्णनात्मक परीक्षा होईल ज्यामध्ये पत्र लेखन आणि निबंध यांचा समावेश असेल. या परीक्षेमध्ये चुकीच्या उत्तरासाठी कोणतेही नकारात्मक गुण लागू होणार नाहीत.

निवड झालेल्या उमेदवारांना सुरुवातीला दोन आगाऊ वेतनवाढींसह ₹48,480 इतके मूळ वेतन मिळणार आहे. अर्ज शुल्काची बाब सांगायची झाल्यास, सामान्य, ओबीसी आणि ईडब्ल्यूएस प्रवर्गातील उमेदवारांसाठी ₹750 इतके शुल्क निश्चित करण्यात आले असून, अनुसूचित जाती, जमाती आणि दिव्यांग उमेदवारांसाठी कोणतेही शुल्क लागणार नाही. अर्ज प्रक्रिया करण्यासाठी SBI Careers संकेतस्थळावर जाऊन CBO भरती 2025 विभागात “Apply Online” या लिंकवर क्लिक करून नोंदणी करावी लागेल. त्यानंतर आवश्यक माहिती भरून फोटो, स्वाक्षरी, डाव्या अंगठ्याचा ठसा, हस्तलिखित घोषणापत्र, शैक्षणिक व अनुभव प्रमाणपत्रे तसेच ओळखपत्र यांसह फॉर्म पूर्ण करून शुल्क भरायचे आहे. नंतर फॉर्म सबमिट करून त्याची प्रिंट काढावी.

अर्ज करताना उमेदवारांनी फक्त एका सर्कलसाठीच अर्ज करावा आणि संबंधित सर्कलमधील स्थानिक भाषा त्याला अवगत असणे आवश्यक आहे. त्यामुळे या भरती प्रक्रियेत सहभागी होऊ इच्छिणाऱ्या उमेदवारांनी वेळेत अर्ज प्रक्रिया पूर्ण करणे गरजेचे आहे.







