पुणे : आलिया भट्ट आणि रणवीर सिंग कॉफी विथ करण 7 च्या पहिल्या एपिसोडचे पाहुणे होते. या शोमध्ये दोघांनीही त्यांच्या वैयक्तिक आयुष्याबद्दल अनेक खुलासे केले. यादरम्यान आलियाने शोमध्ये रणबीर कपूरसोबतच्या नात्याची सुरुवातही सांगितली. विमानातील चुकीच्या सीटवरून दोघांमधील रोमान्स कसा सुरू झाला हे आलियाने सांगितले.
याबाबत आलिया म्हणाली, आम्ही दोघे विमानाने ब्रह्मास्त्र वर्कशॉपला जात होतो. आम्ही दोघे एकत्र बसलो होतो. मला आठवतं जेव्हा रणबीरफ्लाइटमध्ये आला आणि त्याला माझ्या शेजारी सीट मिळाली होती. हा विचार करून मी खूप उत्तेजित होते पण तो माझ्यासोबत बसताच त्याच्या सीटमध्ये काही अडचण आली. यानंतर फ्लाईट स्टाफने त्याला दुसरीकडे बसविले.
आलिया पुढे म्हणाली, ‘यानंतर जेव्हा आमचे संभाषण सुरू झाले, तेव्हा त्याने मला सांगितले की जागेत बदल केल्याने तोही नाराज झाला होता आणि त्याचा मूडही खराब झाला होता. तिथूनच आमचे सूत जुळले. बाकी सर्वांना माहीत आहे पुढे काय झाले ते.
आलिया आणि रणबीरने 14 एप्रिल रोजी त्यांच्या वांद्रे येथील घरात लग्न केले आणि आता दोघेही लवकरच आई बाबा होणार आहेत. आलियाने गेल्या महिन्यात तिच्या गरोदरपणाची घोषणा केली होती. दोघेही त्यांच्या होणाऱ्या बाळासाठी खूप उत्सुक आहेत.
बाळाच्या आगमनापूर्वी दोघांचा ब्रह्मास्त्र हा चित्रपटही प्रदर्शित होणार आहे. त्यांचा एकत्र पहिला चित्रपट ९ सप्टेंबरला प्रदर्शित होणार आहे. या दोघांची केमिस्ट्री पडद्यावर पाहण्यासाठी चाहते आता खूपच उत्सुक आहेत.
