नागपूर: नागराज मंजुळे दिग्दर्शित ‘झुंड’ (Jhund) या चित्रपटातील तरुण कलाकार प्रियांशु क्षत्रिय उर्फ बाबू छत्री याची (Jhund Actor Murder) नागपूर शहरात निर्घृण हत्या झाल्याने मोठी खळबळ उडाली आहे. मंगळवारी मध्यरात्री नारा परिसरात ही धक्कादायक घटना उघडकीस आली, या प्रकरणी प्रियांशुचा मित्र धूप शाहू याला पोलिसांनी अटक केली आहे.
हत्या कशी झाली?
प्रियांशु क्षत्रिय मंगळवारी रात्री त्याचा मित्र धूप शाहूसोबत घराबाहेर गेला होता. नंतर रात्री उशिरा नारा परिसरात तो गंभीर जखमी अवस्थेत आढळून आला होता. त्याचे शरीर वायरने बांधलेले होते आणि त्यांच्यावर चाकूचे अनेक वार करून त्याला गंभीर जखमी केले होते. प्रियांशुला जखमी अवस्थेत पाहिल्यानंतर नागरिकांनी तत्काळ जरीपटका पोलिसांना माहिती दिली. पोलिसांनी तातडीने त्याला मेयो रुग्णालयात दाखल केले, मात्र डॉक्टरांनी त्याला तपासून मृत घोषित केले.
सिनेमानंतरही बदललं नाही आयुष्य
अमिताभ बच्चन यांच्यासोबत काम केलेल्या बाबू छत्रीचे आयुष्य चित्रपटानंतरही फारसे बदलले नव्हते. पोलिसांच्या माहितीनुसार, प्रियांशुचा गुन्हेगारी प्रवृत्तीच्या लोकांशी संबंध होता. त्याच्यावर यापूर्वी चोरीसह काही किरकोळ गुन्ह्यांची नोंद होती. या प्रकरणी त्याला अटकही करण्यात आली होती. आणि तो अनेक दिवस जेलमध्ये होता.
नशेत झालेल्या वादातून हत्या?
गुन्ह्याच्या प्राथमिक तपासानंतर, प्रियांशुच्या बहिणीने दाखल केलेल्या तक्रारीवरून पोलिसांनी तात्काळ त्याचा मित्र धूप शाहू याला अटक केली आहे. ही हत्या नशेत झालेल्या वादातून झाली असावी, असा पोलिसांना प्राथमिक संशय आहे. मात्र, हत्येमागील निश्चित आणि खरे कारण शोधण्यासाठी पोलीस कसून तपास करत आहेत. जरीपटका पोलीस ठाण्याच्या पथक सीसीटीव्ही फुटेज तपासात असून, फॉरेन्सिक तज्ञांमार्फत घटनास्थळाचा पंचनामाही केला आहे. शवविच्छेदन अहवाल प्राप्त झाल्यानंतर हत्येच्या कारणांबाबत आणखी माहिती शक्यता आहे. दरम्यान, हत्या करण्यामागे नेमका काय हेतू होता याबद्दल अधिक माहिती समोर येईल.
